കഥകളുടെ മഹാലോകമാണ് ഇതിഹാസ പുരാണാദികൾ. ആയിരക്കണക്കിന് കഥാപാത്രങ്ങളും ആയിരക്കണക്കിന്‌ സംഭവങ്ങളും നിറഞ്ഞ മഹാസാഗരങ്ങൾ. ആ സാഗരത്തിലടങ്ങാത്തതായി ഒന്നുമില്ല ഒറ്റയൊറ്റ കൃതികൾ എന്ന നിലയിൽ വായിക്കുമ്പോഴുള്ള ആസ്വാദ്യതയല്ല , സ്വയം പൂർണ്ണങ്ങളായ ഒറ്റയൊറ്റ കഥകളായി അവ വായിക്കുമ്പോൾ നമുക്ക് ലഭിക്കുന്നത്. കൃത ഹസ്തനായ മാലിയുടെ ആഖ്യാന പാടവം തെളിയിക്കുന്ന ഒരു ബൃഹദ് ഗ്രന്ഥമാണ് ‘പുരാണ കഥാമാലിക.’ കൈരളി ചിൽഡ്രൻസ് ബുക്ക് ട്രസ്റ്റ് 12 ഭാഗങ്ങളിലായി പ്രസിദ്ധീകരിച്ച പുരാണകഥാ മാലിക പിന്നീട് ഒരൊറ്റ സമാഹാരമായി പ്രസിദ്ധീകരിച്ചിരുന്നു. അതിന്റെ ഡി സി പതിപ്പാണ് മാലിയുടെ പുരാണകഥാ മാലിക.

അതിസമ്പന്നമായ നമ്മുടെ കഥാപാരമ്പര്യം പുരാണങ്ങളിലും ഇതിഹാസങ്ങളിലും മറ്റുമായി സംരക്ഷിക്കപ്പെട്ടിരിക്കുന്നു. ബന്ധങ്ങളും ബന്ധവൈചിത്ര്യങ്ങളും ഇടകലർന്ന സംഭവങ്ങളും സംഭ്രാന്തികളും കൊണ്ട് ബഹുലമായ അവയെ കൊച്ചു കഥകളായി പുനരാഖ്യാനം ചെയ്തത് യശഃ ശരീരനായ മാലിയാണ്. 1110 പേജുകളോടു കൂടിയ ഈ ബൃഹദ് ഗ്രന്ഥം. പുരാണങ്ങളിലെ 300 ഓളം കഥാപാത്രങ്ങളും കഥകളും പുരാണകഥാമാലികയിൽ ഉൾപ്പെടുത്തിയിട്ടുണ്ട്.മാലിയുടെ രചനാപാടവം തെളിയിക്കുന്ന ഈ കഥകളോരോന്നും തികച്ചും ആസ്വാദ്യകരമാണ്.

കേരളത്തിലെ പ്രശസ്തനായ ബാലസാഹിത്യകാരനായിരുന്നു മാലി എന്ന തൂലികാ നാമത്തിൽ അറിയപ്പെട്ടിരുന്ന വി. മാധവൻ നായർ. അദ്ദേഹം കുട്ടികൾക്കായി പല ചെറുകഥകളും നോവലുകളും രചിച്ചിട്ടുണ്ട്. കർണശപഥമെന്ന ഒരു ആട്ടക്കഥയും രചിച്ചു. അൻപതിലധികം പുസ്തകങ്ങൾ എഴുതിയിട്ടുണ്ട്. സ്വന്തം പുസ്തകങ്ങളിൽ ഏഴെണ്ണം ഇംഗ്ലീഷിലേക്ക് സ്വയം പരിഭാഷപ്പെടുത്തിയിട്ടുമുണ്ട്. മാവേലി എന്ന തൂലികാ നാമവും വനമാലി എന്ന തൂലികാനാമവും ഉപയോഗിചിട്ടുണ്ട്. 70-കളിൽ മാലിക എന്ന കുട്ടികൾക്കുള്ള മാസികയും നടത്തി.

നാടകം, ആട്ടക്കഥ തുടങ്ങിയവയും സംഗീതശാസ്ത്രം, വാസ്തുവിദ്യ തുടങ്ങിയ വിഷയങ്ങളെക്കുറിച്ചും മാലി പുസ്തകങ്ങൾ എഴുതിയിട്ടുണ്ട്. ആനുകാലികങ്ങളിൽ കായിക ലേഖനങ്ങളും മറ്റ് ലേഖനങ്ങളും പ്രബന്ധങ്ങളും എഴുതിയിരുന്നു. റേഡിയോയിൽ കമന്റേറ്ററുമായിരുന്നു. വളരെക്കാലം ആകാശവാണിയിൽ ജോലി ചെയ്തു. സ്റ്റേഷൻ ഡയറക്റ്ററായി വിരമിച്ചു. അവിടെ നിന്ന് ഡപ്യൂട്ടേഷനിൽ നാഷണൽ ബുക്ക്ട്രസ്റ്റിൽ എഡിറ്ററായും ജോലി ചെയ്തിരുന്നു. സംസ്ഥാന നിർമ്മിതി കേന്ദ്രത്തിന്റെ ചീഫ് എഡിറ്ററായി പ്രവർത്തിച്ചിട്ടുണ്ട്. 1970-ൽ കേരള സാഹിത്യ അക്കാദമി അവാർഡും 1988-ൽ കൈരളി ചിൽഡ്രൻസ്‌ ബുക്‌ട്രസ്‌റ്റിന്റെ ബാലസാഹിത്യ അവാർഡും ലഭിച്ചു.1994 ജൂലൈ 2 നു അന്തരിച്ചു.

മാലിയുടെ ഞങ്ങൾ പ്രസിദ്ധീകരിച്ച കൃതികൾ

”എവിടെ നിന്നോ ഒരു രാത്രി പുഴയും നീന്തി വന്ന ഫയല്‍വാന്‍ തയ്യല്‍ക്കാരന്‍ മേസ്ത്‌രിയുടെ മേല്‍നോട്ടത്തില്‍ ഗ്രാമത്തില്‍ താമസമുറപ്പിക്കുന്നു. മേസ്ത്‌രി ഏര്‍പ്പാടാക്കിക്കൊടുക്കുന്ന ഗുസ്തികളില്‍ എതിരാളികളെയെല്ലാം തോല്‍പ്പിച്ചു ഫയല്‍വാന്‍ ഗ്രാമാവാസികള്‍ക്കിടയില്‍ നായക പരിവേഷം നേടുന്നു. പിന്നീട് ഗ്രാമത്തിലെ സുന്ദരിയായ ചക്കരയെ കല്യാണം കഴിക്കുകയും ചെയ്യുന്നു. പക്ഷെ ക്രമേണ ഗുസ്തിക്കാരാരും വരാതാവുകയും വരുമാനം കുറഞ്ഞു തുടങ്ങുകയും ചെയ്യുമ്പോള്‍ കണ്ടമാനം ഭക്ഷണം കഴിക്കുകയും പണിയൊന്നും എടുക്കാതെ സദാ കസര്‍ത്ത് ചെയ്യുകയും ചെയ്യുന്ന ഫയല്‍വാന്‍, മേസ്ത്‌രിക്കൊരു ബാദ്ധ്യതയാകുന്നു. തടിമിടുക്കുണ്ടെങ്കിലും അയാള്‍ ഒരു പുരുഷത്വമില്ലാത്തവനാണെന്ന് അറിയുന്നതോടെ ചക്കരയും അയാളെ ഉപേക്ഷിക്കുന്നു. ഒടുവില്‍ വന്നത് പോലെ എങ്ങോട്ടെന്നറിയാതെ ഫയല്‍വാന്‍ നടന്നകലുന്നു..”

പി. പത്മരാജന്‍ രചനയും സംവിധാനവും നിര്‍വഹിച്ച് 1981ല്‍ പുറത്തിറങ്ങിയ മലയാളചലച്ചിത്രമാണ് ഒരിടത്തൊരു ഫയല്‍വാന്‍. റഷീദ്, നെടുമുടി വേണു, ജയന്തി എന്നിവരാണ് പ്രധാന കഥാപാത്രങ്ങളെ അവതരിപ്പിരിച്ചത്. പത്മരാജന്‍ സംവിധാനം ചെയ്ത രണ്ടാമത്തെ ചിത്രമാണിത്.

ഗോദയിലെ അജയ്യനായ ഒരു ഫയല്‍വാന്റെ ജീവിത പരാജയത്തിന്റെ കഥയാണ് ഈ ചിത്രം. നിരൂപക ശ്രദ്ധ നേടിയ ഈ ചിത്രം കോലാലംപുര്‍, ഡാല്ലാസ് ഫിലിം ഫെസ്റ്റിവലുകളില്‍ പുരസ്‌കാരങ്ങള്‍ നേടിയിട്ടുണ്ട്. 1981ല്‍ റിലീസായ ഒരിടത്തൊരു ഫയല്‍വാന്‍ എന്ന ചിത്രത്തിന്റെ തിരക്കഥ 2015 ല്‍ ഡി സി ബുക്‌സ് പ്രസിദ്ധീകരിക്കുകയുണടായി. ഇപ്പോള്‍ ഇതിന്റെ 6-ാമത് പതിപ്പ് പുറത്തിറങ്ങി.

മനുഷ്യബന്ധങ്ങളുടെ സങ്കീര്‍ണ്ണതകളും വൈകാരികാവസ്ഥകളും പ്രതികാരവുമെല്ലാം ചേരുന്ന ഈ ഗ്രാമീണകഥയുടെ തിരക്കഥയ്ക്ക് ഇന്നത്തെ കാലത്ത് ഏറെ പ്രസക്തിയുണ്ട്. മലയാള സിനിമയില്‍ യുവത്വത്തിന്റെ ആഘോഷമായി മാറിയ ഒരിടത്തൊരു ഫയല്‍വാന്‍ പ്രമേയത്തിന്റെയും ആഖ്യാനത്തിന്റെയും പ്രത്യേകത കൊണ്ട് എക്കലവും ശ്രദ്ധേയമാണ്. ചലച്ചിത്ര വിദ്യാര്‍ത്ഥികള്‍ക്ക് തിരക്കഥാരചനയുടെ തന്ത്രങ്ങള്‍ പഠിക്കാനുതകുന്ന കൃതിയെന്ന നിലയില്‍ ഇതിന്റെ പ്രസക്തി ഏറെയാണ്.

നന്മകളാല്‍ സമൃദ്ധമായ നാട്ടിന്‍ പുറങ്ങളെക്കുറിച്ചല്ല, അന്തരിച്ച ചലച്ചിത്രകാരന്‍ പി.പത്മരാജന്‍ തന്റെ എഴുത്തിലൂടെയും സിനിമയിലൂടെയും പറഞ്ഞിട്ടുള്ളത്. പച്ചമനുഷ്യരുടെതായ എല്ലാ ഗുണങ്ങളുടെയും ദുര്‍ഗുണങ്ങളുടെയും മൂര്‍ത്തീഭാവങ്ങളാണ് ഓരോ പത്മരാജന്‍ കഥാപാത്രവും. നാട്ടിന്‍പുറത്തെ നായകന്‍ നന്മകളുടെ വിളനിലമായിരിക്കണമെന്ന സങ്കല്പത്തെ മറ്റിമറിച്ച അനവധി ചിത്രങ്ങള്‍ അദ്ദേഹം മലയാളിക്ക് സമ്മാനിച്ചിട്ടുണ്ട്. നിരവധി ദേശീയ, അന്തര്‍ദേശീയ പുരസ്‌കാരങ്ങള്‍ പത്മരാജന്റെ സിനിമാ ജീവിതത്തെ തേടിയെത്തിയിട്ടുണ്ട്. തിരക്കഥാസാഹിത്യത്തില്‍ മാത്രമല്ല നോവല്‍ ശാഖയിലും അ്‌ദ്ദേഹം തന്റെ പ്രതിഭതെളിയിച്ചിട്ടുണ്ട്.

പത്മരാജന്‍ രചിച്ച നക്ഷത്രങ്ങളേ കാവല്‍ എന്ന നോവല്‍ 1971ല്‍ കേരള സാഹിത്യ അക്കാദമി പുരസ്‌കാരവും കുങ്കുമം അവാര്‍ഡും കരസ്ഥമാക്കി. പത്മരാജന്റെ കഥകളും നോവലുകള്‍ രണ്ട് വാല്യങ്ങളിലായി സമാഹരിച്ച് പത്മരാജന്റെ കൃതികള്‍ സമ്പൂര്‍ണ്ണം ഡി സി ബുക്‌സ് പ്രസിദ്ധീകരിച്ചിട്ടുണ്ട്.

ചാർളി ബക്കറ്റിനു ചോക്ലേറ്റ് മറ്റെന്തിനേക്കാളും വളരെ ഇഷ്ടമാണ്. വയറു നിറയെ ചോക്ലേറ്റ് കഴിക്കണമെന്നതാണ് ചാർളിയുടെ വലിയ സ്വപ്നം. അപ്പോഴാണ് ചോക്ലേറ്റ് ഫാക്ടറി ഉടമയായ മിസ്റ്റർ വില്ലി വോങ്ക ലോകത്തിലേക്കും ഏറ്റവും വിചിത്രമായൊരു ആശയവുമായി മുന്നോട്ടു വരുന്നത്. തന്റെ ചോക്ലേറ് ഫാക്ടറി ഭാഗ്യവാന്മാരായ അഞ്ചു കുട്ടികൾക്കായി തുറന്നു കൊടുക്കാൻ അയാൾ തീരുമാനിക്കുന്നു. ജീവിതത്തിലൊരിക്കൽ മാത്രം നേടാനാകുന്ന ഒരവസരമാണിത്. പല തരത്തിലുള്ള മധുര പലഹാരങ്ങളും ചോക്ലേറ്റ് നദിയുമാണവിടെ ഈ ഭാഗ്യവാന്മാരെ കാത്തിരിക്കുന്നത്. അവിടെ എത്തിപ്പെടാനുള്ള ഗോൾഡൻ ടിക്കറ്റ് മാത്രമാണ് ചാർളിക്ക് വേണ്ടത്. അവിടുള്ളതെല്ലാം പിന്നീടവന് സ്വന്തം.

ഇരുപതാം നൂറ്റാണ്ടിലെ മഹാനായ, കുട്ടികളുടെ കഥാകാരന്‍ എന്ന് ഖ്യാതിനേടിയ ആളാണ് റൊവാള്‍ഡ് ഡാല്‍ (Roald Dhal). നോവലിസ്റ്റ്, ചെറുകഥാകൃത്ത്, കവി, തിരക്കഥാ രചയിതാവ് എന്നീ നിലകളിലെല്ലാം തന്റെ വ്യക്തിമുദ്ര പതിപ്പിച്ചിട്ടുള്ള റൊവാള്‍ഡ് ഡാല്‍ പ്രധാനമായും അറിയപ്പെടുന്നത് കുട്ടികളുടെ കഥാകാരന്‍ എന്ന പേരിലാണ്. അദ്ദേഹത്തിന്റെ പുസ്തകങ്ങളുടെ 250 ദശലക്ഷം പ്രതികള്‍ ലോകമെമ്പാടും വിറ്റഴിക്കപ്പെട്ടിട്ടുണ്ട്. നിരവധി ലോകഭാഷകളില്‍ അദ്ദേഹത്തിന്റെ കൃതികള്‍ പരിഭാഷപ്പെടുത്തിയിട്ടുമുണ്ട്.

ഡാലിന്റെ ആദ്യകഥ പ്രസിദ്ധീകരിച്ചുവന്നത് ഈവിനിങ് പോസ്റ്റിലാണ്. 1961-ല്‍ ‘ജെയിംസ് ആന്‍ഡ് ദ ജയന്റ് പീച്ച്’ എന്ന പുസ്തകം പുറത്തുവന്നതോടെ പ്രിയപ്പെട്ട എഴുത്തുകാരനായി ഡാല്‍ കുട്ടികളുടെ ഹൃദയത്തില്‍ സ്ഥാനംപിടിച്ചു. നിരൂപകപ്രശംസ പിടിച്ചുപറ്റിയ ഈ പുസ്തകം വമ്പിച്ച സാമ്പത്തികവിജയംകൂടിയായിരുന്നു. മൂന്ന് വര്‍ഷങ്ങള്‍ക്കുശേഷം ‘ചാര്‍ളി ആന്‍ഡ് ദ ചോക്കലേറ്റ് ഫാക്ടറി’ എന്ന പുസ്തകം പ്രസിദ്ധീകരിച്ചതോടെ ഡാല്‍ കുട്ടികളുടെ എഴുത്തുകാരന്‍ എന്ന നിലയില്‍ കുഞ്ഞുമനസ്സുകളില്‍ സ്ഥിരപ്രതിഷ്ഠ നേടി. പതിറ്റാണ്ടുകള്‍ക്കുശേഷം ഈ രണ്ടു പുസ്തകങ്ങളും ജനശ്രദ്ധ ആകര്‍ഷിച്ച ചലച്ചിത്രങ്ങളായി. ചാര്‍ളി ആന്‍ഡ് ദ ചോക്കലേറ്റ് ഫാക്ടറി എന്ന പുസ്തകം ചലച്ചിത്രമാക്കിയപ്പോള്‍ പേര് ‘വില്ലി വോന്‍ഗ ആന്‍ഡ് ദ ചോക്കലേറ്റ് ഫാക്ടറി’ എന്നാക്കി.

ഡി സി യുടെ കൊച്ചുകൂട്ടുകാർക്കു വേണ്ടിയുള്ള മാമ്പഴം പ്രസിദ്ധീകരണത്തിന് വേണ്ടി ‘ചാര്‍ളി ആന്‍ഡ് ദ ചോക്കലേറ്റ് ഫാക്ടറി’ മലയാളത്തിലേക്ക് വിവർത്തനം ചെയ്തത് ജോസഫ് ലായേൽ ആണ്. ചാര്‍ളിയും ചോക്ലേറ് ഫാക്ടറിയും എന്ന പുസ്തകത്തിന്റെ ആദ്യ ഡി സി പതിപ്പാണ് ഇപ്പോൾ പുറത്തിറങ്ങിയിരിക്കുന്നത്.

മലയാളി ഒരിക്കലും സന്തുഷ്ടനല്ലെന്ന് സാഹിത്യകാരന്‍ എ.സേതുമാധവന്‍. തങ്ങളുടെ വരുമാനത്തിൽ ജീവിക്കാൻ മലയാളികൾക്ക് സാധിക്കുന്നില്ല. മോഹത്തേക്കാള്‍ കൂടുതൽ വ്യാമോഹമാണ്. അത് അളക്കാന്‍ അളവുകോലില്ല. ആഗ്രഹങ്ങള്‍ അമിതമാകുമ്പോള്‍ ആര്‍ഭാടത്തിലേക്ക് എത്തുന്നു. മറ്റൊരാളുടെ ജീവിതം ജീവിക്കാന്‍ മോഹിച്ച് അതില്‍ പരാജയപ്പെട്ട് കടുംകൈചെയ്യുന്നതാണ് മലയാളിയുടെ വ്യാപകചിത്രമെന്നും എ.സേതുമാധവന്‍ പറയുന്നു.

അയാൾ സംസ്ഥാനമായ തമിഴ് നാട്ടിൽ ഒരു അരക്കയ്യൻ ഷർട്ടും കഴിക്കാൻ ഭക്ഷണവുമുണ്ടെങ്കിൽ അവർ ഹാപ്പിയാണ്. എന്നാൽ ഇവിടെ അങ്ങിനെയല്ല . കേരളം ചെറിയ സംസ്ഥാനം. കുറ്റകൃത്യങ്ങള്‍ കൂടുന്നു. ആത്മഹത്യകള്‍ കൂടുന്നു. പരിഷ്കൃതസമൂഹമെന്ന് വിശേഷിപ്പിക്കപ്പെടുന്ന പടിഞ്ഞാറന്‍ സമൂഹത്തോട് അടുത്തുനില്‍ക്കുന്ന ഒരു കപടസംസ്കാരം കേരളത്തിലുണ്ടെന്നാണ് എ.സേതുമാധവന്‍റെ അഭിപ്രായം. ഏതുതരം വായ്പകള്‍ സ്വീകരിക്കാനും മലയാളിക്ക് മടിയില്ല. വായ്പകള്‍ക്കുമീതെ വായ്പ സ്വീകരിക്കാനും മടിയില്ല. സന്തോഷത്തിന് ഒരു വിശുദ്ധി ഉണ്ടാകണം.

സന്തോഷം എന്ന വിഷയത്തെ ആസ്പദമാക്കി മനോരമ സംഘടിപ്പിക്കുന്ന കോണ്‍ക്ലേവിന്‍റെ പശ്ചാത്തലത്തിലാണ് എ.സേതുമാധവന്‍ തന്‍റെ നിരീക്ഷണങ്ങള്‍ പങ്കുവച്ചത്.

അന്ധനായ ധൃതരാഷ്ട്രരുമായുള്ള വിവാഹം ഉറപ്പായപ്പോൾ ഗാന്ധാരി ആദ്യമായി ചെയ്തത് ഒരു പട്ടുവസ്ത്രം വരുത്തുകയാണ് അത് മടക്കി രണ്ടുകണ്ണുകളും മൂടിക്കെട്ടി ഗാന്ധാരി സ്വയം പറഞ്ഞു ” എന്റെ മനസ്സിൽ നടക്കുന്ന അതിശക്തമായ അടിയൊഴുക്കുകൾ ആരും കാണാനിടവരരുത് ”. ഗാന്ധാരി പക്ഷെ പുറത്തു പറഞ്ഞത്‌ മറ്റൊന്നായിരുന്നു.” ഭർത്താവിനില്ലാത്ത യാതൊരു മേന്മയും എനിക്കാവശ്യമില്ല , കണ്ണില്ലാത്ത ഭർത്താവിന് കണ്ണില്ലാത്തവളാണ് ഉത്തമ ഭാര്യ.” കേട്ടവർ കേട്ടവർ ആ ത്യാഗത്തെ പ്രകീർത്തിച്ചു. പുരാണത്തിലെ സഹനത്തിന്റെയും ത്യാഗത്തിന്റെയും യശഃസ്തംഭമായ ഗാന്ധാരിയുടെ കഥ.

ഗാന്ധാരി ഹസ്തിന പുരിയിലേക്ക് , കൗരവ പാണ്ഡവ കുമാരന്മാരുടെ ജനനം , രാജകുമാരന്മാർക്കിടയിലെ ശത്രുത , യുധിഷ്‌ഠിരൻറെ രാജസൂയം , കള്ളച്ചൂത് , അജ്ഞാതവാസം , ഗാന്ധാരി യുടെ ധർമ്മബോധം , യുദ്ധം , ഗാന്ധാരീ വിലാപം , യുധിഷ്‌ഠിരൻ രാജാവാകുന്നു , വനവാസം എന്നീ ഉള്ളടക്കങ്ങളാണ് ഗാന്ധാരി എന്ന പുസ്തകത്തിൽ. ഡി സി മാമ്പഴം പ്രസിദ്ധീകരണമായ ഗാന്ധാരി കഥയുടെ പുനരാഖ്യാനം നിർവ്വഹിച്ചിരിക്കുന്നത് ഡോ. പി.കെ ചന്ദ്രനാണ്.

പുരാണത്തിൽ സഹനത്തിന്റെയും ത്യാഗത്തിന്റെയും യശഃ സ്തംഭമായാണ് ഗാന്ധാരി നിലകൊള്ളുന്നത്. ഭാരതത്തിന്റെ വടക്കുപടിഞ്ഞാറ് സിന്ധു നദീതട തീരത്ത് സ്ഥിതി ചെയ്യുന്ന ഗാന്ധാരം അത്യാകർഷകമായ പ്രദേശമാണ്. ഗാന്ധാരത്തിലെ കുതിരകളും പെൺ മണികളും രാജാക്കന്മാരുടെ ഹരമാണ്.ഗാന്ധാര രാജാവായ സുബലന്റെ കണ്ണിലുണ്ണിയായിരുന്നു തന്റെ ഓമന മകൾ ഗാന്ധാരി . പരാമപാവനയും പരമശാന്തയുമായ പെൺകുട്ടി.വേദശാസ്ത്ര പരംഗതയും ഗുരുപൂജാ തത്പരയുമായ വളർന്ന സുബലജ മഹാദേവഭക്തയായിരുന്നു. സർവ്വാംഗ സുന്ദരിയായ ഗാന്ധാരി യെ വരിക്കാൻ രാജകുമാരന്മാർ തേടി ചെല്ലുന്ന കാലം. അങ്ങനെയിരിക്കെ ഒരിക്കൽ ……

അനശ്വരങ്ങളായ കഥാപാത്രങ്ങളിലൂടെ ഭാരതീയ ഇതിഹാസ സഞ്ചയത്തെ കുട്ടികൾക്കും മുതിർന്നവർക്കുമായി അവതരിപ്പിക്കുന്ന പരമ്പരയാണ് ” പുരാണ കഥാപാത്രങ്ങൾ ”. എണ്ണമില്ലാത്ത കഥാപാത്രങ്ങളും തീരാത്ത കഥകളുമായി സമ്പന്നമാണ് നമ്മുടെ ഇതിഹാസങ്ങൾ. ഭീഷ്മർ , ഹനുമാൻ , ദ്രൗപദി , ഗാന്ധാരി , രാവണൻ , സീത , കുന്തി , വിശ്വാമിത്രൻ , യയാതി , കണ്ണകി , സത്യവതി , ദ്രോണർ , ഘടോത്കചൻ , നാരദൻ തുടങ്ങി പ്രോജ്ജ്വലങ്ങളായ നിരവധി പുരാണ കഥാപാത്രങ്ങൾ നമുക്കുണ്ട്. ഇതിഹാസത്തിലെ അനശ്വര കഥകൾ കഥാപാത്രങ്ങളിലൂടെ അവതരിപ്പിക്കുന്ന പുരാണകഥാപാത്ര പരമ്പര കുട്ടികൾക്കായി ഒരുക്കുകയാണ് ഡി സി മാമ്പഴം.

കുട്ടികൾക്കൊപ്പം മുതിർന്നവർക്കും ആസ്വാദ്യകരമാകും വിധം തയ്യാറാക്കിയ ഈ കഥകൾ എല്ലാംതന്നെ തികച്ചും ലളിതമാണ്. പ്രശസ്ത ബാലസാഹിത്യകാരന്മാരായ ഡോ. കെ ശ്രീകുമാർ. ഡോ. പി കെ ചന്ദ്രൻ , ഉല്ലല ബാബു , പി രമ തുടങ്ങിയവരാണ് കഥകളുടെ പുനരാഖ്യാനം നിർവ്വഹിച്ചിരിക്കുന്നത്.

എഴുപതുകളില്‍ യുവാവയിരുന്ന ഒരാള്‍ക്ക് വിപ്ലവസ്വപ്‌നങ്ങള്‍ കാണാതെ വയ്യ. ലോകത്തെ മാറ്റിമറിക്കാന്‍ താനെന്തെങ്കിലും ചെയ്‌തേ തീരു എന്നു വെമ്പി വിപ്ലവപ്രസ്ഥാനങ്ങളിലേക്ക് എടുത്തുചാടിയവര്‍ നിരവധി. അവരുടെ ആത്മാര്‍ത്ഥമായ പ്രവര്‍ത്തനങ്ങള്‍ നമ്മുടെ സമൂഹത്തെയും സംസ്‌കാരത്തെയും പുതുക്കിപ്പണിയുകയും ചെയ്തു. എന്നാല്‍ പ്രസ്ഥാനങ്ങളുടെ ശിഥിലീകരണങ്ങള്‍ക്കുശേഷം അതിലുള്‍പ്പെട്ട വ്യക്തികള്‍ അനുഭവിച്ച സംഘര്‍ഷങ്ങളുടെ ചരിത്രം സമൂഹം അറിഞ്ഞിട്ടുണ്ടോ..? അത്തരമൊന്ന് രേഖപ്പെടുത്താനുള്ള സാര്‍ത്ഥകമായ ഉദ്യമമാണ് കഥാകൃത്തും നോവലിസ്റ്റുമായ കരുണാകരന്‍ യുവാവായിരുന്ന ഒന്‍പതുവര്‍ഷം എന്ന തന്റെ നോവലിലൂടെ ശ്രമിക്കുന്നത്. നക്‌സല്‍ ബാരിയുടെ 50ാം വര്‍ഷത്തിലാണ് നോവല്‍ പുറത്തിറങ്ങിയതെന്നതും യാദൃശ്ചികമാണ്.

ഒരാളെ കൊല്ലാന്‍ അയാളെ അറിയണമെന്നില്ല എന്ന വാചകത്തോടെ തുടങ്ങുന്ന യുവാവായിരുന്ന ഒമ്പതുവര്‍ഷം എന്ന കൃതിയെുതാന്‍ വര്‍ഷങ്ങളെടുത്തുവെന്നും നക്‌സല്‍ ബാരിയുടെ അമ്പത് വര്‍ഷവുമായി ഈ നോവലിന്റെ പ്രസാദനത്തിന് ഒരുപങ്കുമില്ലെന്നും അദ്ദേഹം ഒരു ഓണ്‍ ലൈന്‍ചാനലിനു നല്‍കിയ അഭിമുഖത്തില്‍ വ്യക്തമാക്കുന്നു. വര്‍ഷങ്ങളെടുത്തു ഇത് എഴുതാന്‍. ആദ്യം ചില സുഹൃത്തുക്കളോടാണ് കഥപറഞ്ഞത്. നക്‌സല്‍ബാരിയുടെ അമ്പതുവര്‍ഷവുമായി ഈ നോവല്‍ പ്രസാദനത്തിന് ബന്ധമില്ല. മാത്രമല്ല. ഇതിന്റെ കഥ ഓര്‍മ്മയിലാണ് പ്രവര്‍ത്തിക്കുന്നത്. നോവലിന്റെ ഘടന അങ്ങനെയാണ് കണ്ടത്. ഓര്‍മ്മയിലെ പ്രവര്‍ത്തമെന്നാല്‍ നിറഞ്ഞുകവിയുന്ന ദിനചര്യകളില്‍ സംഭവിക്കുന്നതും. കാലഗണന അന്‍പതുവര്‍ഷത്തിലല്ല അറ്റങ്ങള്‍ ഇല്ലാതാകുന്ന ഓര്‍മ്മയിലാണ് പരിഗണിച്ചത് അദ്ദേഹം പറയുന്നു. യുവാവായിരിക്കുക എന്നാല്‍ അതിര്‍ത്തികളില്‍ നഷ്ടപ്പെടുന്ന യാത്രയോ വഴിയോ പോലെയാണ്. ഒന്‍പത് വര്‍ഷം മാത്രം ജീവിച്ച നുണയോ സത്യമോ എന്നതിനെക്കാള്‍ അത് ഒരാള്‍ ഇറങ്ങിത്തിരിച്ച യാത്രയുടെ, വഴിയുടെ, കല്പിത കഥയാണ്. ആ അക്കം കൃത്യമല്ല. എത്ര വേണമെങ്കിലും മറച്ചുവെക്കാവുന്നതും നീട്ടി വെക്കാവുന്നതുമായ ഒരു സ്വരം ആ സംഖ്യയുടെ പറച്ചിലിലുണ്ട്. അല്ലെങ്കില്‍ അങ്ങനെ കാണാവുന്നതേയുള്ളുവെന്നാണ് യുവാവായിരുന്ന ഒന്‍പതുവര്‍ഷം എന്ന തലക്കെട്ടിനെക്കുറിച്ച് അദ്ദേഹം പറഞ്ഞത്. അതായത് ആ തലക്കെട്ടിനെ നെഗറ്റീവായും പോസറ്റീവായും കാണാവുന്നതാണ്.

മതിയഴകന്റെ മരണം, സുബ്രഹ്മണ്യദാസിന്റെ ആത്മഹത്യ, യു.പി ജയരാജിന്റെ കഥാവഴികള്‍, അരീക്കോട് വര്‍ഗീസിന്റെ കൊലപാതകം ഇങ്ങനെ ആ കാലഘട്ടത്തിന്റെ ചരിത്രത്തിലേക്ക് നീളുന്ന സൂചനകള്‍ യുവാവായിരുന്ന ഒന്‍പത് വര്‍ഷം എന്ന നോവലില്‍ കാണാവുന്നതാണ്. ഇനെക്കുറിച്ചുള്ള അദ്ദേഹത്തിന്റെ പ്രതികരണമാകട്ടെ ഇങ്ങനെയാണ് നോവലിന്റെ ഘടന ഓര്‍മ്മയിലാണ് നക്‌സലൈറ്റുകളുടെ കൂടെ കഴിഞ്ഞതും അതിലെ പ്രധാന പ്രവര്‍ത്തകരുമായി പുലര്‍ത്തിയിരുന്ന ബന്ധങ്ങളും എന്റെ ഓര്‍മ്മയാണ്. ചരിത്രത്തെയല്ല ഭാവനയെയാണ് ഞാന്‍ ആശ്രയിക്കുന്നത്. ആ അര്‍ത്ഥത്തില്‍ എന്റെ എഴുത്തു ചരിത്രത്തിനെതിരാണ്. അഥവാ ചരിത്രത്തെ അത് വിലമതിക്കുന്നില്ല. സംഭവങ്ങളുമായി നമ്മള്‍ പുലര്‍ത്തുന്ന ബന്ധം സാമൂഹികമായ ഓര്‍മ്മയല്ല. ദാസോ മതിയഴകനോ അല്ല കഥാപാത്രങ്ങളിലേക്കോ കഥയിലേക്കോ വരുന്നത്. മറിച്ച് ആ വര്‍ത്തമാനങ്ങളാണ്(പ്രസന്‍സ്). അതിലെ കൈവിട്ട നിമിഷങ്ങളാണ്. അതാണ് കഥയോടുള്ള എന്റെ സമീപനും നോവലിന്റെ ഘടനയും.!
താന്‍ കണ്ടുറങ്ങുന്ന സ്വപ്‌നങ്ങളാണ് നേവലിലെ കഥാപാത്രങ്ങളിലേക്കും ആവേശിപ്പിച്ചിരിക്കുന്നത്. നോവലില്‍ ഇടക്കിടെ കടന്നുവരുന്ന മേതില്‍ രാധാകൃഷ്ണനും തന്റെ സുഹൃത്താണെന്ന് കരുണാകരന്‍ പറയുന്നു. സ്വപ്നങ്ങള്‍ ഭ്രമങ്ങളല്ല, തോന്നലുകളുടെ യഥാര്‍ത്ഥ ജീവിതമാണ്. ഇതൊക്കെ എന്റെ എഴുത്തിനെ, രീതിയെ രൂപപ്പെടുത്തുന്നതില്‍ സഹായിച്ചിട്ടുണ്ട്. അദ്ദേഹം പറഞ്ഞുനിര്‍ത്തുന്നു.

‘നമ്മുടെ സാഹിത്യത്തിന്റെയും രാഷ്ട്രീയത്തിന്റെയും ഓര്‍മ്മയില്‍ കേരളത്തിലെ നക്‌സല്‍ബാരി പ്രസ്ഥാനത്തോളം കയറിയിയമറ്റൊന്നില്ല. മെയ് 25ന് നക്‌സല്‍ബാരി കലാപത്തിന് 50 വര്‍ഷം തികഞ്ഞു…!

മലയാള കഥാ സാഹിത്യ ചരിത്രത്തിൽ അനിഷേധ്യമായൊരു സ്ഥാനം നേടിയെടുത്ത മലയാറ്റൂർ രാമകൃഷ്ണന്റെ ഏറ്റവും മികച്ച കഥകളുടെ സമാഹാരമാണ് ‘കഥകൾ മലയാറ്റൂർ. ഇത് ഒരേ സമയം അനിശ്ചിതമായ കാലത്തിന്റെയും പ്രശ്ന സങ്കീർണ്ണതകൾ നിറഞ്ഞ മനുഷ്യ ബന്ധങ്ങളുടെയും സമ്മിശ്രമായ കഥന രൂപങ്ങളാകുന്നു. മലയാറ്റൂരിന്റെ ഓരോ കഥയും അനുഭവാവിഷ്കാരത്തിന്റെ വൈവിധ്യം കൊണ്ട് അവിസ്മരണീയമാകുന്നു. 2015 ജൂലൈയിൽ പ്രസിദ്ധീകരിച്ച ‘കഥകൾ മലയാറ്റൂരിന്റെ മൂന്നാം ഡി സി പതിപ്പാണിത്.

നോവല്‍ സാഹിത്യത്തിലും കഥയിലും ചിത്രകലയിലും കാര്‍ട്ടൂണിലും ചലച്ചിത്രത്തിലും ഒരേപോലെ വ്യാപരിച്ച പ്രതിഭയായിരുന്നു മലയാറ്റൂര്‍ രാമകൃഷ്ണന്‍. വേരുകള്‍, യന്ത്രം, യക്ഷി, ആറാം വിരല്‍, ശിരസ്സില്‍ വരച്ചത്, രക്തചന്ദനം തുടങ്ങിയ നോവലുകളിലൂടെയും സര്‍വ്വീസ് സ്‌റ്റോറി- എന്റെ ഐ എ എസ് ദിനങ്ങള്‍, ഓര്‍മ്മകളുടെ ആല്‍ബം തുടങ്ങിയ ഓര്‍മ്മപ്പുസ്തകങ്ങളും മലയാളികൾ ഇരു കയ്യും നീട്ടി സ്വീകരിച്ചവയാണ്. ഏതു കാലത്തെയും ജീവിതാവസ്ഥകളെ ദീർഘവീക്ഷണം ചെയ്തെഴുതിയ മലയാറ്റൂരിന്റെ കഥാ പ്രപഞ്ചത്തിൽ നിന്ന് പ്രശസ്തമായ അനന്തപുരം ക്ലബ്ബിലെ സ്ഥിരാംഗം ബ്രിഗേഡിയര്‍ വിജയന്‍ മേനോന്‍ നായകനായ മലയാറ്റൂരിന്റെ ബ്രിഗേഡിയര്‍ കഥകളൊഴിച്ചുള്ള തിരഞ്ഞെടുത്ത രചനകളാണ് ‘കഥകൾ മലയാറ്റൂരിന്റെ ഉള്ളടക്കം.

വീട്ടാനാകാത്ത കടം, അവസാനം, പന്ത്രണ്ട് പവന്‍, ഇരുപതു മിനിട്ടുകളുടെ കഥ, മരണക്കിണര്‍, നിങ്ങള്‍ക്കിതു സംഭവിക്കാതിരിക്കട്ടെ, മകന്‍, അതിരില്‍ പൂത്തുനിന്ന മരങ്ങള്‍ തുടങ്ങി വിവിധ ആനുകാലികങ്ങളില്‍ പ്രസിദ്ധീകരിച്ചു വന്ന കാലത്തുതന്നെ അനുവാചകശ്രദ്ധ പിടിച്ചുപറ്റിയ അറുപതോളം കഥകള്‍ ഇതില്‍ സമാഹരിച്ചിരിക്കുന്നു. മലയാറ്റൂരിന്റെ ഭാവനാപ്രപഞ്ചം സൃഷ്ടിച്ച അപരിചിതലോകങ്ങളെ അടുത്തറിയാന്‍ വായനക്കാരെ വിനീതമായി ക്ഷണിക്കുന്ന കൃതിയാണ് ‘കഥകള്‍ മലയാറ്റൂര്‍.

മലയാറ്റൂര്‍ രാമകൃഷ്ണന്‍ 1927 മേയ് 30ന് പാലക്കാട് ജില്ലയിലെ പുതിയ കല്പാത്തിയില്‍ ജനിച്ചു. 1955ല്‍ മട്ടാഞ്ചേരിയില്‍ രണ്ടാം ക്ലാസ് മജിസ്‌ട്രേറ്റായാണ് ഔദ്യോഗികജീവിതം ആരംഭിച്ചത്. 1958ല്‍ ഐഎഎസ് ലഭിച്ചു. സബ് കലക്ടര്‍, കലക്ടര്‍, വകുപ്പ് മേധാവി, ഗവണ്‍മെന്റ് സെക്രട്ടറി, പൊതുമേഖലാ സ്ഥാപനങ്ങളില്‍ ചെയര്‍മാനും എംഡിയും, റവന്യൂ ബോര്‍ഡ് മെമ്പര്‍ എന്നീ നിലകളില്‍ ജോലി നോക്കി. 1981 ഫെബ്രുവരിയില്‍ ഐഎഎസ്സില്‍ നിന്ന് രാജിവച്ചു. ഏഴു വര്‍ഷക്കാലം മലയാറ്റൂര്‍ രാമകൃഷ്ണന്‍ ലളിതകലാ അക്കാദമി ചെയര്‍മാനായിരുന്നു.

മലയാറ്റൂരിന്റെ ഇരുപതിലധികം കൃതികള്‍ ഡി സി ബുക്‌സ് പ്രസിദ്ധീകരിച്ചിട്ടുണ്ട്. വേരുകള്‍ കേരള സാഹിത്യ അക്കാദമി അവാര്‍ഡും യന്ത്രം വയലാര്‍ അവാര്‍ഡും സാഹിത്യ പ്രവര്‍ത്തക അവാര്‍ഡും നേടിയിട്ടുണ്ട്. 1997 ഡിസംബര്‍ 27ന് അദ്ദേഹം അന്തരിച്ചു.

മലയാറ്റൂരിന്റെ ഞങ്ങൾ പ്രസിദ്ധീകരിച്ച മറ്റു കൃതികൾ  

ബാലസാഹിത്യം എന്ന മേഖലയില്‍ നിരവധി ക്ലാസ്സിക് സൃഷ്ടികളാണ് വര്‍ഷങ്ങളായി പ്രസിദ്ധീകരിക്കപ്പെട്ടുകൊണ്ടിരിക്കുന്നത്. ഇംഗ്ലീഷ് ഭാഷയിലും മലയാളത്തിലുമായി ഒട്ടനവധി കഥാപാത്രങ്ങള്‍ കുട്ടികളുടെ ചിന്താലോകത്തെ ആഴത്തില്‍ സ്പര്‍ശിച്ചിട്ടുണ്ട്. എന്നാല്‍ ഇന്നത്തെ തലമുറ എത്രത്തോളം സാഹിത്യത്തോട് അടുത്തു നില്‍ക്കുന്നു എന്നുള്ളത് ഒരു ചോദ്യമാണ്.

കുട്ടികളെ കഥകളുടെ ലോകത്തേയ്ക്ക് എത്തിക്കുക എന്ന ലക്ഷ്യവുമായി ഒരു നോവല്‍ പ്രസിദ്ധീകരിക്കപ്പെട്ടിരിക്കുകയാണ്. അധ്യാപകനും എഴുത്തുകാരനുമായ നിധീഷ് നടേരിയുടെ കഥയിറങ്ങി വരുന്നവരാര് എന്ന ചെറുനോവല്‍ കഥാസാഹിത്യലോകത്ത് വേറിട്ടുനില്‍ക്കുന്നതും ഈ പ്രത്യേകത കൊണ്ടാവും. കുട്ടികള്‍ ഇഷ്ടപ്പെടുന്ന സാഹിത്യ സൃഷ്ടികളെ തിരഞ്ഞെടുത്ത് സിദ്ധു എന്ന കുട്ടിയുടെ സ്വപ്‌നലോകത്തേയ്ക്ക് കടത്തി വിടുകയാണ് കഥാകൃത്ത്.

അത്ഭുതലോകത്തില്‍ നിന്നും ആലീസും അവളുടെ മുയലും ലില്ലിപ്പുട്ടില്‍ നിന്നും ഗളിവറും ഇരുപത് വര്‍ഷത്തെ ഉറക്കത്തില്‍നിന്നും ഉണര്‍ന്ന റിപ് വാന്‍ വിങ്ക്‌ളും ആംഗലേയസാഹിത്യത്തില്‍ നിന്നും ഇറങ്ങി വരുമ്പോള്‍ മലയാളത്തിന്റെ പ്രിയപ്പെട്ട എഴുത്തുകാരായ വൈക്കം മുഹമ്മദ് ബഷീര്‍, ഒ വി വിജയന്‍, എം ടി വാസുദേവന്‍ നായര്‍, എം മുകുന്ദന്‍ എന്നിവരുടെ തൂലികയില്‍പ്പിറന്ന മൂക്കനും അപ്പുക്കിളിയും അപ്പുണ്ണിയും അല്‍ഫോസന്‍അച്ചനും ഈ നോവലിന്റെ ഭാഗമാകുന്നു. കഥകളില്‍ നിന്നും കഥകളിലേയ്ക്ക് സുഖകരമായ യാത്ര സാധ്യമാക്കുന്ന എക്കാലെത്തെയും ക്ലാസ്സിക് സൃഷ്ടി ആയിരത്തൊന്ന് രാവുകള്‍ എന്ന അറേബ്യന്‍ നാടോടിക്കഥയില്‍നിന്നും കഥാപാത്രങ്ങള്‍ രൂപപ്പെടുന്നുണ്ട് ഈ നോവലില്‍.

വേറിട്ടൊരു വായനാനുഭവമാണ് കുട്ടികള്‍ക്കായ് എഴുതപ്പെട്ടിട്ടുള്ള  കഥയിറങ്ങി വരുന്നവരാര് എന്ന ചെറുനോവല്‍ നല്‍കുന്നത്. ബാലസാഹിത്യത്തില്‍ ഇതൊരു പരീക്ഷണമാണ് എന്നു പറയാം. ഈ നോവലിലൂടെ കുട്ടികള്‍ക്ക് നിരവധി കഥകളുടെ വിസ്മയലോകത്തേയ്ക്കുള്ള വാതായനമാണ് തുറന്നു കിട്ടുന്നത്. അത്ഭുതലോകത്തില്‍ ആലീസ്, ഗളിവറുടെ യാത്രകള്‍, റിപ് വാന്‍ വിങ്കിള്‍ മറ്റ് കഥകളും, വിശ്വവിഖ്യാതമായ മൂക്ക്, ദൈവത്തിന്റെ വികൃതികള്‍, ഖസാക്കിന്റെ ഇതിഹാസം, ആയിരത്തൊന്ന് രാവുകള്‍ തുടങ്ങി ഈ നോവലില്‍ സൂചിപ്പിച്ചിരിക്കുന്ന പുസ്തകങ്ങള്‍ നമുക്ക് ലഭ്യമാണ്. ടാബും വീഡിയോ ഗെയിമും പരിചയപ്പെടുന്നതിനൊപ്പം സാഹിത്യത്തിന്റെ നറുമണംകൂടി കൂടി കുട്ടികള്‍ അറിയട്ടെ.

ആരോഗ്യമാണ് നമ്മുടെ ഏറ്റവും വലിയ സ്വത്ത്. അതിന്റെ അഭാവത്തില്‍ ബാക്കിയെല്ലാം നിഷ്പ്രഭമാണ്. ഋഷികളും ആചാര്യന്മാരും യോഗികളും നമ്മുടെ പൂര്‍വ്വികരും ശരീരത്തിന്റെയും മനസ്സിന്റെയും ആരോഗ്യസംരക്ഷണത്തിന് അതീവ ശ്രദ്ധാലുക്കളായിരുന്നു. അതിന് അവര്‍ സ്വീകരിച്ച മാര്‍ഗ്ഗമാണ് യോഗാസനം.

ആരോഗ്യം സംരക്ഷിക്കേണ്ടതും സമ്പാദിക്കേണ്ടതും നമ്മുടെ ആവശ്യമാണ്. ആഹാരം പോലെ തന്നെ ശരീര സംരക്ഷണത്തിനും രോഗനിവാരണത്തിനുമുളള അനുപേക്ഷണീയ ഘടകമാണ് വ്യായാമം . ഇന്നത്തെ കമ്പ്യുട്ടര്‍യുഗത്തില്‍ വ്യായാമരഹിതമായ ജീവിതശൈലി ഭൂരിപക്ഷത്തെയും രോഗികളാക്കി മാറ്റുന്നു. ഇത് അകറ്റനുളള ഒരേഒരു മാര്‍ഗ്ഗം വ്യായാമം ചെയ്യുക മാത്രമാണ്. മറ്റൊരാളുടെ സഹായമില്ലാതെയും ഉപകരണവും കൂടാതെ നിര്‍വഹിക്കാനുളള ഒരു എളുപ്പ മാര്‍ഗ്ഗമാണ് യോഗാസനങ്ങള്‍.

ശരീരത്തിലെ മലിനപ്പെടുത്തുന്ന വസ്തുക്കള്‍ അടിഞ്ഞുകൂടാതെ സൂക്ഷിച്ചാല്‍ രോഗത്തെ ഭയപ്പെടേണ്ടതില്ല. യുവാവ് , വ്യദ്ധന്‍, അതിവ്യദ്ധന്‍, ദുര്‍ബലന്‍, വ്യാധിതന്‍ ഇവര്‍ക്കെല്ലാം യോഗാസനങ്ങള്‍ ചെയ്യാമെന്നാണു ശാസ്ത്രവിധി. ഒരോരുത്തര്‍ക്കും അനുയോജ്യമായ ആസനങ്ങള്‍ തെരഞ്ഞെടുക്കുന്നതാണ് ഉത്തമം. ഒരു ബെഡ്ഷീറ്റ് ഒഴികെ മറ്റു യാതൊരു ഉപകരണങ്ങളും അതിനു ആവശ്യമില്ല.

യോഗാസനങ്ങള്‍ ശാസ്ത്രീയമായി പഠിക്കുക, ക്ഷമയോടും ക്യത്യനിഷ്ഠയോടും കൂടി ചെയ്യുക എന്നതാണ് പ്രധാനം.യോഗാഭ്യാസങ്ങള്‍ കൊണ്ടു ശരീരത്തിനു മാത്രമല്ല മനസ്സിനും പ്രയോജനമുണ്ട്. പ്രത്യേക പ്രയ്ത്‌നമൊന്നും കൂടാതെതന്നെ മനസ്സിന്റെ ചപലതകളും ദുശ്ശീലങ്ങളും സ്വയം മാറിക്കൊളളും. ജീവിതത്തില്‍ നേരിടുന്ന എല്ലാപ്രതിസന്ധികളെയും ധീരമായും ശാന്തമായും അതിജീവിക്കാന്‍ യോഗ അഭ്യസിക്കുന്നതിലൂടെ സാധിക്കും.

മനോവ്യാപാരങ്ങളെ നിരോധിക്കുന്നതാണ് യോഗ. യോഗ ദിനചര്യയാക്കുവാന്‍ ശീലിക്കുന്നവര്‍ക്കുളള എളുപ്പമാര്‍ഗ്ഗങ്ങളാണ് യോഗാചാര്യ ഗോവിന്ദന്‍നായരുടെ യോഗ്യവിദ്യ എന്ന പുസ്തകം പരിചയപ്പെടുത്തുന്നത്.  ഡി സി ബുക്‌സ് ലൈഫ്ഇംപ്രിന്റില്‍ പ്രസിദ്ധീകരിച്ച പുസ്തകത്തിന്റെ 25-ാമത് പതിപ്പാണ് ഇപ്പോള്‍ പുറത്തുള്ളത്.

സാഹിത്യസൃഷ്ടി നടത്തുന്നവർ ഭാഷ തെറ്റ് കൂടാതെ പ്രയോഗിക്കാൻ പഠിക്കണമെന്ന് കഥാകൃത്ത് ടി പത്മനാഭൻ. ബീന സജീവിന്റെ കടൽ പ്രണയങ്ങൾ എന്ന കഥാ സമാഹാരം പ്രകാശനം ചെയ്യുകയായിരുന്നു അദ്ദേഹം. ശിൽപം തീർക്കുന്ന ആശാരിയെപോലെ എവിടെ ഉളി ശക്തിയായും മൃദുവായും പ്രയോഗിക്കണമെന്ന് അറിഞ്ഞിരിക്കണം. പലർക്കും അതിനു കഴിയുന്നില്ല എന്നതാണ് ദുഃഖകരം. ദൃശ്യ മാധ്യമങ്ങളാണ് തെറ്റായ പ്രയോഗങ്ങൾ കൂടുതലായി ജനങ്ങളിൽ എത്തിക്കുന്നത്.

ഭാഷയുടെ ശുദ്ധിയെ കുറിച്ച് ജീവിതകാലം മുഴുവൻ സംസാരിച്ചയാളാണ് ഇ എം എസ്.കഥയും കവിതയും രചിക്കുന്നവർ ഭാഷാ ഇൻസ്റ്റിറ്റ്യൂട്ട് പ്രസിദ്ധീകരിച്ച , ഭാഷയെ കുറിച്ചുള്ള ഇ എം എസിന്റെ പുസ്തകം വായിക്കണം. ശ്രോതാക്കൾക്കും വായനക്കാർക്കും മനസിലാകുന്നതായിരിക്കണം രചനകൾ. അതിനു വിശാലമായ വായന ആവശ്യമാണ്. കുഞ്ഞുണ്ണിയുടെ കടങ്കഥ വായിച്ചത് കൊണ്ട് പ്രയോജനമില്ല. കുമാരനാശാൻ , വള്ളത്തോൾ , ഉള്ളൂർ , എന്നിവരെ പോലുള്ളവരുടെ കാവ്യ ഗ്രന്ഥങ്ങൾ വായിക്കണം. വനിതാ എഴുത്തുകാർ വൃത്തികേടുകൾ എഴുതി പ്രശസ്തരാകാൻ ശ്രമിക്കുന്ന പ്രവണത ഏറി വരുന്നുണ്ടെന്നും ടി. പത്മനാഭൻ കൂട്ടിച്ചേർത്തു.

ഹിന്ദുമതത്തിന്‌ അടിസ്ഥാനമായി കരുതപ്പെടുന്ന ചതുർ‌വേദങ്ങളിൽ ആദ്യത്തേതായ ഋഗ്വേദത്തിന് മലയാള വ്യാഖ്യാനം. പുരാതന ഇന്ത്യയിലെ വൈദികസംസ്കൃതസൂക്തങ്ങളുടെ ഒരു ശേഖരമാണ്‌ ഋഗ്വേദം. പ്രൊഫ. ശ്രീവരാഹം ചന്ദ്രശേഖരന്‍ നായർ തയ്യാറാക്കിയ ഋഗ്വേദത്തിന്റെ മലയാള വ്യാഖ്യാനം ‘ഗുരു ദക്ഷിണാ ഭാഷ്യം’ എന്ന പേരില്‍ ഭാഷാ ഇന്‍സ്റ്റിറ്റ്യൂട്ടാണ് പ്രസിദ്ധീകരിച്ചിരിക്കുന്നത്.1000 പേജുള്ള എട്ട് വോള്യങ്ങള്‍ നിലവിലുള്ള വ്യാഖ്യാനങ്ങളില്‍ ഏറ്റവും ബൃഹത്താണ്. ഇന്ദ്രൻ, വരുണൻ, അഗ്നി, വായു, സൂര്യൻ തുടങ്ങിയ ദേവതകളുടെ സ്തുതികളും ഉപാസനാക്രമങ്ങളും ആണ്‌ ഋഗ്വേദത്തിൽ കൂടുതലായും ഉള്ളത്.ഒന്നര വര്‍ഷം കൊണ്ടാണ് വ്യാഖ്യാനം തയ്യാറാക്കിയത്. ഇപ്പോള്‍ ഇംഗ്ലീഷിലേക്കും തര്‍ജ്ജിമ ചെയ്യുന്നുണ്ട്. അഞ്ച് വര്‍ഷമെങ്കിലും പരിഭാഷയ്‌ക്കെടുക്കും എന്നാണ് നിലവിലെ കണക്കുകൂട്ടല്‍.

പ്രൊഫ. ശ്രീവരാഹം ചന്ദ്രശേഖരന്‍ നായർ കേരള സര്‍വ്വകലാശാല, സംസ്‌കൃത സര്‍വ്വകലാശാല എന്നിവിടങ്ങളില്‍ പരീക്ഷാ ബോര്‍ഡ് അംഗമായും ചെയര്‍മാനായും ബോര്‍ഡ് ഓഫ് സ്റ്റഡീസ് അംഗമായും സേവനം അനുഷ്ഠിച്ചിട്ടുണ്ട്. സംസ്‌കൃത ഭാഷയിലും ദര്‍ശനങ്ങളിലുമുള്ള പാണ്ഡിത്യത്തിന് പ്രൊഫ. ചന്ദ്രശേഖരന്‍ നായര്‍ക്ക് 2012ല്‍ രാഷ്ട്രപതി പുരസ്‌കാരം നല്‍കി രാജ്യം ആദരിച്ചിരുന്നു. ഋഗ്വേദത്തിന്റെ മലയാള വ്യാഖ്യാനത്തെ കുറിച്ചറിഞ്ഞ റിച്ചാര്‍ഡേ ഹേ എം പി ചന്ദ്രശേഖരന്‍ നായരുടെ ‘ശ്രീവരാഹത്തെ വീട്ടിലെത്തി അദ്ദേഹത്തെ സന്ദര്‍ശിച്ചു. വ്യാഖ്യാനത്തിന്റെ ഒരു കോപ്പി പ്രൊഫസർ എംപിക്ക് സമ്മാനിച്ചു.

ഗുരുനാഥന്റെ സ്പര്‍ശവും ചിന്തയും അനുഗ്രഹവും പൂക്കളായി വിടര്‍ന്നു നില്‍ക്കുന്ന ഉദ്യാനത്തിലെ ഊടുവഴികളിലൂടെ ഞാന്‍ എന്റെ സംഗീതവുമായി യാത്രപോകുന്നു.
ഈ വഴി അങ്ങുകാണിച്ചുതന്നതാണ്.
വിളക്കും വഴിയും അങ്ങ്, പാദങ്ങള്‍മാത്രം എന്റേത്.
പാദങ്ങള്‍ മാത്രം. അവയുടെ ബലവും വേഗവും പോലും ഞാന്‍ ആര്‍ജ്ജിച്ചത് അങ്ങില്‍ നിന്നാണ്.
ഈ ജന്മമാണ് എന്റെ നന്ദിവാക്യം.
എന്റെ സംഗീതമാണ് അര്‍ഘ്യം.
ഞാനാണ് ദക്ഷിണ…!

ഒരു ശിഷ്യന്‍ ഗുരുനാഥന് നല്‍കാവുന്ന ഏറ്റവും വലിയ ദക്ഷിണ, ജീവിതത്തില്‍ തിരഞ്ഞെടുത്ത വഴികളിലൂടെ വിജയക്കൊടിപ്പാറിച്ച് നടക്കുക എന്നതാണ്. വിജയംമാത്രം നേടുന്ന ആ ജീവിതം തന്നെയാണ് നല്ല ഗുരുദക്ഷിണ.. ഇവിടെ മലയാളത്തിലെ പ്രശസ്ത സംഗീത സംവിധായകനും ഗായകനുമായ എം ജയചന്ദ്രന്‍ അദ്ദേഹത്തിന്റെ പ്രിയ ഗുരുനാഥനുള്ള ഗുരുദക്ഷിണ അര്‍പ്പിക്കുകയാണ്. വരിക ഗന്ധര്‍വ്വഗായകാ എന്ന പുസ്തകത്തിലൂടെ.

കാലാതിവര്‍ത്തിയായ ഈണങ്ങളുടെ മഹാസാഗരം മലയാളത്തിനു സമ്മാനിച്ച ദേവരാജന്‍ മാസ്റ്ററെക്കുറിച്ച് എം ജയചന്ദ്രന്‍ എഴുതിയ ഓര്‍മ്മക്കുറിപ്പുകളാണ്’ വരിക ഗന്ധര്‍വ്വഗായകാ’. ദേവരാജന്‍ മാസ്റ്റര്‍ എന്ന വന്‍മരത്തണലിലൂടെ നാദബ്രമ്ഹത്തിന്റെ ഉള്ളറിയുന്ന സംഗീതജ്ഞനായി എം ജയചന്ദ്രന്‍ എന്ന സംഗീതസംവിധായകന്‍ എങ്ങനെ വളര്‍ന്നു എന്നതിന്റെ സൂക്ഷ്മവിശദീകരണമാണ് ഡി സി ബുക്‌സ് പ്രസിദ്ധീകരിച്ച ഈ പുസ്തകം. ഗുരുവിലൂടെ സഞ്ചരിക്കുമ്പോള്‍ ഒരുവന്‍ അനുഭവിക്കുന്ന അനുഭൂതിയുടെ വനസരോവരങ്ങള്‍ കാലത്തിന്റെ നിറച്ചാര്‍ത്തില്‍ ചാലിച്ച് നമുക്ക് മുന്നിലേക്ക് കൊണ്ടുവരുന്നു ഈ പുസ്തകത്തിലൂടെ. മലയാളികളും സംഗീതാസ്വാദകരും ഇന്നേവരെ കേട്ടിട്ടില്ലാത്ത അനുഭവിച്ചറിഞ്ഞിട്ടില്ലാത്ത സ്‌നേഹത്തിന്റെയും വാത്സല്യത്തിന്റെയും നിറകുടമായ ദേവരാന്‍മാസ്റ്ററിനെ ഈ ശിഷ്യന്റെ വാക്കുകളിലൂടെ നമുക്ക് കണ്ടെത്താനാകും.

എം ബി ശ്രീനിവാസനുമായുള്ള ബന്ധം അവതരിപ്പിച്ചുകൊണ്ടാണ് പുസ്തകത്തിന്റെ ആരംഭം. എന്നാല്‍ സംഗീതതചക്രവര്‍ത്തിയായിരുന്ന ദേവരാജന്‍ മാസ്റ്റര്‍ ആരായിരുന്നു എന്തായിരുന്നു എന്നും വരുംതലമുറയയെയും നമ്മളെയും ഓര്‍മ്മപ്പെടുത്തുന്നു ഈ പുസ്തകം. കൂടാതെ എം ജയചന്ദ്രന്റെ സംഗീതജീവിതാനുഭവങ്ങളും, വളര്‍ച്ചകളും സംഗീതത്തിലെ വ്യക്തിബന്ധങ്ങളെയും കോറിയിട്ടിരിക്കുന്നു.

”ഇത്രമേല്‍ ആത്മാര്‍ത്ഥവും ഗംഭീരവുമായ ഒരു ഗുരുപ്രണാമം ആപൂര്‍വ്വം. ലോകത്തിലെ ഏറ്റവും തിളക്കമുള്ള വിഗ്രഹം ഗുരുനാഥന്റേതായിരിക്കാം.ദൈവത്തിനുപോലും ഗുരുനാഥന്റെ ഛായയുണ്ട്. ഭാരതത്തില്‍ ഒരു ക്ലാസിക് കലാകാരന്റെ മനസ്സില്‍ ഗുരുവോളം ചൈതന്യമുള്ള മറ്റൊരു രൂപമില്ല. അയാള്‍ ഓര്‍ക്കുമ്പോള്‍, അയാള്‍ വരയ്ക്കുമ്പോള്‍ ആ രൂപത്തിന് കൈവരുന്ന തിളക്കം മറ്റാരു വരച്ചാലും കിട്ടുകയില്ല. ദേവരാജന്‍ മാസ്റ്റര്‍ എന്ന് കേള്‍ക്കുമ്പോള്‍ വിരലറ്റംവരെ കോരിത്തരിക്കുന്നു ജയചന്ദ്രന്‍. എളിമയാണ് ഗുരുത്വത്തിന്റെ ആവിഷ്‌കരണം എന്നതിന്റെ സൂക്ഷ്മമായ വിശദീകരണമാണീ പുസ്തകമെന്ന്” കല്പറ്റ നാരായണന്‍ അവതാരികയില്‍ അഭിപ്രായപ്പെടുന്നതും ഈ പുസ്തകത്തിന്റെ പകിട്ട് വര്‍ദ്ധിപ്പിക്കുന്നു.

സ്വയം തൊഴിൽ സംരംഭങ്ങൾ ആരംഭിക്കുവാൻ ആഗ്രഹിക്കുന്നവർക്കുള്ള വഴികാട്ടിയാണ് ‘കുറഞ്ഞ ചെലവിൽ മികച്ച നേട്ടമുണ്ടാക്കാൻ 100 സ്വയം തൊഴിൽ സംരംഭങ്ങൾ. ചെറിയ രീതിയിലോ വിപുലമായോ തുടങ്ങാൻ കഴിയുന്ന നൂറിലേറെ ആശയങ്ങൾക്ക് പുറമെ നിലവിലുള്ള ഏതൊരു ബിസിനസ്സും കൂടുതൽ വിജയകരമാക്കുവാൻ സഹായിക്കുന്ന പ്രായോഗിക നിർദേശങ്ങളും അടങ്ങിയതാണ് ‘കുറഞ്ഞ ചെലവിൽ മികച്ച നേട്ടമുണ്ടാക്കാൻ 100 സ്വയം തൊഴിൽ സംരംഭങ്ങൾ.

നമുക്ക് ചുറ്റും അനന്തമായ ബിസിനസ് അവസരങ്ങൾ ഉണ്ടെങ്കിലും എന്ത് ബിസിനസ്സ് തുടങ്ങും അഥവാ എനിക്ക് പറ്റിയ ബിസിനസ്സ് എന്താണ് എന്ന ചോദ്യം വലയ്ക്കാത്തവർ കുറവായിരിക്കും. അത്തരം സംശയങ്ങൾക്കുള്ള ശരിയായ ഉത്തരം നൽകുവാൻ ഈ പുസ്തകത്തിന് കഴിയും.

ലോകരാജ്യങ്ങൾ ഒന്നടങ്കം സാമ്പത്തിക കുഴപ്പത്തിലേക്ക് കൂപ്പുകുത്തുമ്പോൾ പോലും വിജയിപ്പിക്കുവാൻ കഴിയുന്ന നിരവധി ബിസിനസ്സ് ആശയങ്ങൾ ‘കുറഞ്ഞ ചെലവിൽ മികച്ച നേട്ടമുണ്ടാക്കാൻ 100 സ്വയം തൊഴിൽ സംരംഭങ്ങൾ നമുക്ക് കാണിച്ചു തരുന്നു.

ബിസിനസ്സ് എന്ന് കേൾക്കുമ്പോൾ തന്നെ നെറ്റിചുളിക്കുന്നവർ ധാരാളമുണ്ട് നമുക്കിടയിൽ. എന്നാൽ നമ്മുടെ ചെറിയ ചില ആശയങ്ങൾ ജീവിതത്തിലും ബിസിനസ്സിലും വലിയ മാറ്റങ്ങൾ ഉണ്ടാക്കാൻ കഴിയുമെന്ന വിശ്വാസമാണ് നമുക്ക് ആദ്യം വേണ്ടത്. ബിസിനസ് നടത്തി വിജയിച്ചവരുടെയും പരാജയപ്പെട്ടവരുടെയും ജീവിതം പരിശോധിച്ചാൽ പൊതുവായി പല കാര്യങ്ങളും നമുക്ക് മനസിലാക്കാൻ സാധിക്കും.

സാമ്പത്തിക അച്ചടക്കമില്ലായ്മയും ശരിയായ സമയത്ത് ശരിയായ തീരുമാനമെടുക്കാനുള്ള കഴിവില്ലാതാകുകയും ബിസിനസ്സിൽ മാത്രമല്ല നമ്മുടെ ജീവിതത്തെ പോലും താളം തെറ്റിക്കും.ലോകത്തിന്റെ ഏതൊരു കോണിലും ചെറുതോ വലുതോ ആയ ബിസിനസ്സ് നടത്തുന്ന ഏതൊരാൾക്കും നിസ്സംശയം അനുകരിക്കാനാവുന്നതും അതുവഴി ബിസിനസ്സ് വിജയം ഉറപ്പിക്കാൻ കഴിയുന്നതുമായ ചില വിജയ മന്ത്രങ്ങളാണ് ‘കുറഞ്ഞ ചെലവിൽ മികച്ച നേട്ടമുണ്ടാക്കാൻ 100 സ്വയം തൊഴിൽ സംരംഭങ്ങൾ

ബിസിനസ്സ് ആശയങ്ങളെ കുറിച്ച് പഠിക്കുവാൻ ജീവിതം തന്നെ മാറ്റി വച്ച ഒരാളാണ് ജോൺ വിൽഫ്രഡ്.സാമ്പത്തിക ശാസ്ത്രത്തിൽ ബിരുദം നേടിയ ശേഷം ഇപ്പോൾ സീറോ വേസ്റ്റ് കൃഷിയിൽ പഠനം നടത്തുകയും പരിശീലിപ്പിക്കുകയും ചെയ്യുന്നു. പുസ്തകത്തിന്റെ ആദ്യ ഡി സി പതിപ്പാണ് ഇപ്പോൾ പുറത്തിറങ്ങിയിരിക്കുന്നത്.

പ്രശസ്ത സാഹിത്യകാരനും ഒ.എൻ.വി. കൾച്ചറൽ അക്കാദമി നിർവാഹകസമിതി അംഗവുമായ പ്രഭാവർമ്മ എഴുതുന്നു

മലയാളത്തിന്റെ മഹാകവിയായ ഒ.എൻ.വി.യുടെ ജന്മദിനമായ ഇന്ന് ധന്യമായ ആ സ്മരണ മുൻനിർത്തി ഒരു സാംസ്കാരികസംരംഭം ഉദ്ഘാടനംചെയ്യപ്പെടുന്നു; ശ്രദ്ധേയമായ ഒരു ദേശീയ സാഹിത്യപുരസ്കാരം നിലവിൽവരികയും ചെയ്യുന്നു. ഒ.എൻ.വി. കൾച്ചറൽ അക്കാദമിയുടെ ഉദ്ഘാടനവും അക്കാദമിയുടെ പ്രഥമ ഒ.എൻ.വി. സാഹിത്യപുരസ്കാരത്തിന്റെ സമർപ്പണവും തിരുവനന്തപുരത്ത് ടാഗോർ തിയേറ്ററിൽ അക്കാദമിയുടെ മുഖ്യരക്ഷാധികാരികൂടിയായ മുഖ്യമന്ത്രി പിണറായി വിജയൻ നിർവഹിക്കും.

അനവദ്യസുന്ദരങ്ങളായ കവിതകളാലും ഭാവാത്മകഗാനങ്ങളാലും മലയാളത്തിന്റെ മനസ്സിനെ നവോന്മേഷദായകങ്ങളായ അനുഭൂതികളിലേക്ക് ആനയിച്ച മഹാകവിയുടെ സ്മരണ യ്ക്കായി അദ്ദേഹത്തിന്റെ ശിഷ്യരും സുഹൃത്തുക്കളുമടങ്ങുന്ന സഹൃദയർ മുൻകൈയെടുത്താണ് തിരുവനന്തപുരം ആസ്ഥാനമായി ഒ.എൻ.വി. കൾച്ചറൽ അക്കാദമിക്ക്‌ തുടക്കംകുറിക്കുന്നത്.

അക്കാദമിയുടെ ഉദ്ഘാടനച്ചടങ്ങിൽ പ്രഥമ ഒ.എൻ.വി. സാഹിത്യപുരസ്കാരം സുഗതകുമാരിക്ക്‌ സമർപ്പിക്കും. മൂന്നുലക്ഷംരൂപയും ശില്പവും പ്രശസ്തിപത്രവും ഉൾപ്പെടുന്ന അവാർഡ് ഒന്നിടവിട്ട വർഷങ്ങളിൽ മലയാളസാഹിത്യത്തിനും ഇതരവർഷങ്ങളിൽ മലയാളം ഉൾപ്പെടെയുള്ള ഇന്ത്യൻ സാഹിത്യത്തിനും എന്ന നിലയ്ക്കാണ് നൽകുക. ദേശീയതലത്തിലുള്ളതാവും എല്ലാ ഇന്ത്യൻഭാഷാ സാഹിത്യശാഖകളെയും പരിഗണിക്കുന്ന ഒ.എൻ.വി. പുരസ്കാരം. 50,000 രൂപയും ശില്പവും പ്രശസ്തിപത്രവും ഉൾപ്പെട്ട യുവസാഹിത്യ പുരസ്കാരവും ഇതിനനുബന്ധമായി ഏർപ്പെടുത്തിയിട്ടുണ്ട്. ആര്യാഗോപി, സുമേഷ് കൃഷ്ണൻ എന്നിവർക്കാണ് പ്രഥമവർഷം യുവസാഹിത്യപുരസ്കാരം നൽകുന്നത്.

മഹത്ത്വമാർന്ന ഒരു സവിശേഷ സർഗാത്മകപൈതൃകം അവശേഷിപ്പിച്ചുകൊണ്ടാണ് ഒ.എൻ.വി. കടന്നുപോയത്. ഭാവാർദ്രങ്ങളായ കവിതകൾ, മൗലികമായ ചിന്തയുടെ തെളിവെളിച്ചം പ്രസരിപ്പിക്കുന്ന പ്രബന്ധങ്ങൾ, വിജ്ഞാനപ്രദമായ പ്രഭാഷണങ്ങൾ തുടങ്ങി പലതലങ്ങളുണ്ട്‌ വിലപ്പെട്ട ആ സാംസ്കാരിക ഈടുവെപ്പിന്. അത്‌ പരിരക്ഷിച്ച് വരുംതലമുറകൾക്ക് കൈമാറുകയെന്നത് അടൂർ ഗോപാലകൃഷ്ണൻ അധ്യക്ഷനും എം.ടി. വാസുദേവൻനായർ, സുഗതകുമാരി, യേശുദാസ് എന്നിവർ രക്ഷാധികാരികളുമായ ഒ.എൻ.വി. കൾച്ചറൽ അക്കാദമിയുടെ അടിസ്ഥാനദൗത്യമാണ്.

ഇന്ത്യൻ സാഹിത്യരംഗത്തെ മികവാർന്ന സർഗപ്രതിഭയ്ക്കായുള്ള പുരസ്കാരം ആദ്യവർഷം മലയാളത്തിലെ സമുന്നതമായ സാഹിത്യവ്യക്തിത്വത്തിന്‌ നൽകണമെന്നാണ് അക്കാദമി നിശ്ചയിച്ചത്. ഡോ. എം. ലീലാവതി, സി. രാധാകൃഷ്ണൻ, പ്രഭാവർമ എന്നിവരുൾപ്പെട്ട ജൂറി ഏകകണ്ഠമായാണ് സുഗതകുമാരിയെ പുരസ്കാരത്തിനായി കണ്ടെത്തിയത്.

മാനുഷസത്തയുടെ മഹാഗായകനായിരുന്ന ഒ.എൻ.വി.യുടെ പേരിലുള്ള പ്രഥമപുരസ്കാരം അതേസത്തയെ പ്രത്യാനയിച്ച്‌ സമൂഹമനഃസാക്ഷിയിൽ പുനഃസ്ഥാപിക്കാനായി കവിതകൊണ്ടും കർമംകൊണ്ടും നിരന്തരം ഇടപെട്ടുപോരുന്ന സുഗതകുമാരിക്ക്‌ സമർപ്പിക്കുന്നതിൽ സവിശേഷമായ ഒരു ഔചിത്യഭംഗിയുണ്ട്.

പ്രകൃതിയോടും മനസ്സിനോടുമുള്ള സ്നേഹാതിരേകം ഒരേപോലെ ഏതാണ്ട്‌ ഒരേഘട്ടത്തിൽ പങ്കിട്ടുപോന്നവരാണ് ഒ.എൻ.വി.യും സുഗതകുമാരിയും. നന്മയ്ക്കുവേണ്ടിയുള്ള നിത്യപ്രാർഥനയായിരുന്നിട്ടുണ്ട് ഇരുവർക്കും കവിത. ലോകത്തോടും കാലത്തോടുമുള്ള അതിരെഴാത്ത സ്നേഹത്തിന്റെ കാരുണ്യപൂരമായിരുന്നിട്ടുണ്ട് ഇരുവരുടെയും കാവ്യദർശനം. മലയാളഭാഷയോടും കേരളീയ സംസ്കാരത്തോടുമുള്ള ഹൃദയവായ്പ്‌ ശ്വാസധാരപോലെ സാഹോദര്യപൂർവം പങ്കിട്ടിട്ടുണ്ട് ഈ ഇരു കാവ്യവ്യക്തിത്വങ്ങളും. പുരസ്കാരം സുഗതകുമാരിക്ക്‌ ലഭിക്കുമ്പോൾ കവിതയിലെ സർഗാത്മകമായ മൗലികതയ്ക്കൊപ്പം ഈ ഘടകങ്ങളും ശ്രദ്ധേയമാവുന്നു.

ഒ.എൻ.വി. സ്മരണ നിലനിർത്തുന്ന അക്കാദമിയുടെ സമഗ്രമായ പദ്ധതികളിൽ പഠന-ഗവേഷണ കാര്യങ്ങൾ, മലയാളഭാഷയുടെ ശാക്തീകരണം തുടങ്ങിയവയും ഉൾപ്പെടുന്നു. തിരുവനന്തപുരം ആസ്ഥാനമാക്കിയാണ് അക്കാദമി പ്രവർത്തിക്കുക. എങ്കിലും കേരളക്കരയിലെന്നല്ല, മലയാളിയുള്ള എല്ലാ ദിക്കിലും വ്യാപരിക്കുന്നതാവും അക്കാദമിയുടെ പ്രവർത്തനങ്ങൾ. ഓരോ വർഷവും ഒ.എൻ.വി.യുടെ ജന്മവാർഷികദിനമായ മേയ് 27-നോ അടുത്ത ദിവസങ്ങളിലോ ആയിരിക്കണം അവാർഡ് സമർപ്പണച്ചടങ്ങ് എന്നാണ് അക്കാദമി നിശ്ചയിച്ചിട്ടുള്ളത്.

സാഹിത്യരംഗത്തെ എഴുത്തുകാരോ ആസ്വാദകരോ ആയ നൂറുപേരോട് അഭിപ്രായം ചോദിച്ചിട്ട് അതിൽ ഏറ്റവും കൂടുതൽ പേർ നിർദേശിക്കുന്ന അഞ്ചുപേരുൾപ്പെട്ട പട്ടികയിൽനിന്നായിരിക്കും അവാർഡ് ജേതാവിനെ തിരഞ്ഞെടുക്കുക.

കടപ്പാട് : മാതൃഭൂമി

സ്വാതന്ത്ര്യസമര ചരിത്രം സമഗ്രമായി പ്രതിപാദിക്കുന്ന ഒട്ടേറെ കൃതികള്‍ രചനകളായും വിവര്‍ത്തനങ്ങളായും മലയാളത്തിലുണ്ട്. അവയില്‍, പ്രതിപാദനത്തിന്റെ സവിശേഷതകൊണ്ട് വ്യത്യസ്തത പുലര്‍ത്തുന്ന കൃതിയാണ് കെ. തായാട്ടിന്റൈ നാം ചങ്ങല പൊട്ടിച്ച കഥ‘. കുട്ടികള്‍ക്കായി രചിക്കപ്പെട്ട ഈ കൃതിയില്‍ സ്വാതന്ത്ര്യസമര ചരിത്രം അടുക്കും ചിട്ടയോടുംകൂടി കഥപറയുന്ന ശൈലിയല്‍ ലളിതമായി അവതരിപ്പിച്ചിരിക്കുന്നു. സാമാന്യം ദീര്‍ഘമായ ഈ ചരിത്രകഥാഖ്യാനത്തില്‍ പ്രാധാന്യം അര്‍ഹിക്കുന്ന ഒരു സംഭവവും ‘ഒഴിവാക്കിയിട്ടില്ല’ എന്നതിനാല്‍ സമഗ്രമായ സ്വാതന്ത്ര്യസമര വിവരണമാണ് കൃതി നല്‍കുന്നത്. കേരളത്തിലെ കുട്ടികള്‍ക്ക് നമ്മുടെ സ്വാതന്ത്ര്യസമരത്തില്‍ താത്പര്യം ഉണര്‍ത്തുന്നതിനാണ് കെ.തായാട്ട് ഈ ഗ്രന്ഥം രചിച്ചിട്ടുള്ളത്.

ഒന്നാം സ്വാതന്ത്ര്യസമരമെന്ന് അറിയപ്പെടുന്ന 1857ലെ സായുധകലാപം മുതല്‍ 1947ലെ അധികാരക്കൈമാറ്റം വരെ 90 വര്‍ഷം നടന്ന വ്യത്യസ്ത സമരധാരകളാണ് ഇന്ത്യന്‍ സ്വാതന്ത്ര്യസമരം എന്ന് പറയുന്നത്. എന്നാല്‍, ഈ കൃതിയില്‍ 1757ലെ പ്ലാസിയുദ്ധം തൊട്ടുള്ള കാര്യങ്ങള്‍ പരാമര്‍ശിക്കപ്പെടുന്നുണ്ട്. ഒട്ടുമിക്ക സ്വാതന്ത്ര്യസമര ചരിത്രങ്ങളും വടക്കേ ഇന്ത്യയില്‍ നടന്ന സംഭവങ്ങള്‍ക്കുമാത്രമാണ് പ്രാധാന്യം നല്‍കിയിട്ടുള്ളത്. കേരളമെന്നൊരു ഭൂപ്രദേശം ഉണ്ടെന്നും അവിടെയും ധീരരക്തസാക്ഷികളായ സമരനായകരുണ്ടായിരുന്നെന്നും മനസ്സിലാക്കാന്‍ ആ രചനകള്‍ ഉപകരിക്കില്ല. ഇന്ന് സി.ബി.എസ്.ഇ പദ്ധതിയില്‍ പഠനം നടത്തുന്ന വിദ്യാര്‍ഥികള്‍ക്കും കേരളത്തില്‍ സ്വാതന്ത്ര്യസമരത്തിന്റെ ഭാഗമായി നടന്ന പോരാട്ടങ്ങള്‍ അപരിചിതമാണ്. എന്നാല്‍, തായാട്ടിന്റെ ഈ കൃതിയില്‍ വേലുത്തമ്പി ദളവയുടെയും പഴശ്ശിരാജയുടെയും സാഹസിക പ്രവൃത്തികളടക്കം സ്വാതന്ത്ര്യം ലക്ഷ്യമാക്കി കേരളത്തില്‍ നടന്ന സംഭവങ്ങളെല്ലാം കഥാപാത്രത്തില്‍ ഇണക്കിച്ചേര്‍ത്തിട്ടുണ്ട്.

രാജാറാം മോഹന്‍ റായ്, രാമകൃഷ്ണ പരമഹംസന്‍, വിവേകാനന്ദന്‍, ദാദാബായ് നവറോജി, ഗോപാലകൃഷ്ണ ഗോഖലെ, ബാലഗംഗാധര തിലകന്‍, അരവിന്ദഘോഷ്, മഹാത്മാഗാന്ധി, ആനി ബസന്റ്, ഭഗത്സിങ്, രാജഗുരു, സുഖ്‌ദേവ്, ജവഹര്‍ലാല്‍ നെഹ്‌റു, അംബേദ്കര്‍, സുഭാഷ് ചന്ദ്രബോസ്, അബുള്‍കലാം ആസാദ് തുടങ്ങിയ മഹത് വ്യക്തികളെല്ലാം   തായാട്ടിന്റെ ഈ പുസ്തകത്തില്‍ പ്രത്യക്ഷപ്പെടുന്നുണ്ട്. ഒന്നാം സ്വാതന്ത്ര്യസമരം (1857), ഇന്ത്യന്‍ നാഷനല്‍ കോണ്‍ഗ്രസിന്റെ രൂപവത്കരണം (1885), പ്ലോഗ്ബാധ (1896), ബംഗാള്‍ വിഭജനം (1905), ഒന്നാം ലോകയുദ്ധം (1914-18), ജാലിയന്‍വാലാബാഗ് കൂട്ടക്കൊല (1919), സൈമണ്‍ കമീഷന്‍ (1927), ഉപ്പുസത്യഗ്രഹം (1927), വട്ടമേശ സമ്മേളനങ്ങള്‍ (193032), ഗാന്ധിജിയുടെ കേരള സന്ദര്‍ശനം (1925), വൈക്കം സത്യഗ്രഹം (1924), രണ്ടാം ലോകയുദ്ധം (193945), ക്വിറ്റ് ഇന്ത്യാ പ്രക്ഷോഭം (1942), ബോംബെയിലെ നാവിക കലാപം (1946), അര്‍ധരാത്രിയിലെ സ്വാതന്ത്ര്യപ്രാപ്തി (1947) തുടങ്ങി സ്വാതന്ത്ര്യ സമരവീഥിയിലെ നാഴികക്കല്ലുകളിലൊന്നുപോലും ഗ്രന്ഥകര്‍ത്താവ് വിട്ടുകളഞ്ഞിട്ടില്ല.

നാം ചങ്ങല പൊട്ടിച്ച കഥ  ബാലസാഹിത്യശാഖയിലാണ് ഉള്‍പ്പെടുന്നതെങ്കിലും ഇന്ത്യാ ചരിത്രത്തില്‍ തല്‍പരരായ മുതിര്‍ന്നവര്‍ക്കും ഉത്തമപഠനസഹായിയാണ് എന്നതില്‍ സംശയംവേണ്ട.

സാഹിത്യകാരനും, നാടകനടനും, നാടകകൃത്തുമായിരുന്നു തായാട്ട് കുഞ്ഞനന്തന്‍ എന്ന കെ.തായാട്ട്. ഒരു സ്‌കൂള്‍ അധ്യാപകന്‍ കൂടിയായിരുന്ന ഇദ്ദേഹത്തിന് സാഹിത്യമേഖലയിലെ വിവിധ പുരസ്‌കാരങ്ങള്‍ക്ക് പുറമേ മികച്ച അധ്യാപകര്‍ക്കുള്ള കേന്ദ്രസംസ്ഥാന അവാര്‍ഡുകളും ലഭിച്ചിട്ടുണ്ട്. 1986 ആഗസ്റ്റ് 15ന് പുറത്തിറങ്ങിയ ഈ ഗ്രന്ഥത്തിന്റെ ഡി സി ബി പതിപ്പ് ഇറങ്ങുന്നത് 2012 ലാണ്. വര്‍ഷങ്ങള്‍ക്കുശേഷം രണ്ടാമത് ഡി സി ബി പതിപ്പ്പു റത്തിറങ്ങിയിരിക്കുകയാണിപ്പോള്‍.

ഡി സി ബുക്‌സ് പ്രസിദ്ധീകരിച്ച കെ തായാട്ടിന്റെ മറ്റ് കൃതികള്‍

മലയാളഭാഷ അറിയാവുന്ന ആർക്കും വഴങ്ങുന്ന ബഷീർ സാഹിത്യം എന്നത് മലയാളത്തിലെ ഒരു സാഹിത്യ ശാഖയായി മാറിയത് വൈക്കം മുഹമ്മദ് ബഷീർ എന്ന കഥകളുടെ സുൽത്താന്റെ ജീവിതാനുഭവങ്ങളുടെ കരുത്തുകൊണ്ടായിരുന്നു. ഹാസ്യം കൊണ്ട് വായനക്കാരെ ചിരിപ്പിച്ചും കരയിപ്പിച്ചും  സമൂഹത്തിന്റെ അടിത്തട്ടിൽ ജീവിക്കുന്ന മനുഷ്യരുടെ കഥകൾ അദ്ദേഹം പറഞ്ഞപ്പോൾ അത് ജീവസ്സുറ്റതായി, കാലാതിവർത്തിയായി.

ജയിൽപ്പുള്ളികളും, ഭിക്ഷക്കാരും, വേശ്യകളും, പട്ടിണിക്കാരും, സ്വവർഗ്ഗാനുരാഗികളും നിറഞ്ഞ ഒരു ഫാന്റസിയായിരുന്നു ബഷീറിന്റെ ലോകം. ഇത്തരം കഥാപാത്രങ്ങളുടെ ചിന്തകൾക്കോ, വികാരങ്ങൾക്കോ അതുവരെയുള്ള സാഹിത്യത്തിൽ സ്ഥാനമുണ്ടായിരുന്നില്ല. സമൂഹത്തിനു നേരെയുള്ള വിമർശനം നിറഞ്ഞ ചോദ്യങ്ങൾ അദ്ദേഹം ഹാസ്യത്തിലൊളിപ്പിച്ചു വച്ചു. സമൂഹത്തിൽ ഉന്നത നിലവാരം പുലർത്തുന്നവർ മാത്രം നായകൻമാരാവുക, മുസ്‌ലിം കഥാപാത്രങ്ങളെ വില്ലന്മാരായി ചിത്രീകരിക്കുക തുടങ്ങിയ പ്രവണതകളിൽ നിന്നും നോവലുകൾക്ക് മോചനം നൽകിയത് ബഷീറാണ്. തീക്ഷ്ണമായ അനുഭവങ്ങളുടെ തീവ്രത അദ്ദേഹത്തിന്റെ കൃതികളെ അനശ്വരമാക്കി. മുസ്‌ലിം സമുദായത്തിൽ ഒരുകാലത്തു നിലനിന്നിരുന്ന എല്ലാവിധ അനാചാരങ്ങൾക്കെതിരെയും വിമർശനാത്മകമായി അദ്ദേഹം തൂലിക ചലിപ്പിച്ചു. ഇതാ ബഷീറിന്റെ ഏതാനും കൃതികൾ

മതിലുകൾ

1965 ൽ ആയിരുന്നു ബഷീറിന്റെ ‘മതിലുകൾ എന്ന നോവൽ പുറത്തിറങ്ങിയത് . ആത്മകഥാപരമായ ഈ നോവലിൽ രാഷ്ട്രീയത്തടവുകാരനായി ജയിലിലെത്തുന്ന ബഷീർ തന്നെയാണു പ്രധാനകഥാപാത്രം. ജയിലിനകത്തു പൂന്തോട്ടം നിർമിക്കുകയും തന്റെ നിലയിൽ ഏറെ സന്തുഷ്ടനായി കഴിയുകയും ചെയ്യുന്ന നായകൻ ജയിൽ ജീവനക്കാരുമായും നല്ല ചങ്ങാത്തത്തിലാണ്. ഇങ്ങനെ നാളുകൾ നീങ്ങവെയാണ് അവിചാരിതമായി മതിലിനപ്പുറത്തെ പെൺജയിലിലെ തടവുകാരിയായ നാരായണിയുമായി ബഷീർ ചങ്ങാത്തത്തിലാകുന്നത്. മതിലിനു രണ്ടു വശങ്ങളിൽ നിന്നുമായി ഹൃദ്യവും രസകരവുമായി നടത്തുന്ന വർത്തമാനങ്ങളിലൂടെ പരസ്പരം തമ്മിൽ കാണാതെ തന്നെ ആ സൗഹൃദം പ്രണയമായി മാറുകയാണു ചെയ്യുന്നത്. ഒടുവിൽ പരസ്പരം കണ്ടുമുട്ടുന്നതിനു തൊട്ടുമുമ്പ് തികച്ചും അവിചാരിതമായി ബഷീർ ജയിലിൽ നിന്നു മോചിതനാകുന്നുവെന്ന അറിയിപ്പ് വാർഡൻ നൽകുമ്പോൾ ശബ്ദമിടറിക്കൊണ്ട് `ഹു വാൺഡ് ഫ്രീ­ഡം? എന്ന ചോദിക്കുന്നിടത്ത് കഥ അവസാനിക്കുന്നു.

നേരും നുണയും

ബഷീറിന്റെ മറ്റേതു പുസ്തകത്തെയും പോലെ അത്രത്തോളം തന്നെ രസപുഷ്ടിയോടെ ഒന്നോ രണ്ടോ മൂന്നോ തവണ ഈ പുസ്തകത്തിലെ ചോദ്യോത്തരങ്ങളും കത്തുകളും വായിക്കാം.അമേരിക്കയിലെ ഐസനോവർ തുടങ്ങി ഗോതുരുത്തി കള്ളുഷാപ്പുടമസ്ഥൻ മാത്യു വരെയും , വരട്ടു ചൊറി മുതൽ ചന്ദ്രഗോളത്തിലേക്കുള്ള യാത്ര വരെയും എല്ലാരും എല്ലാവിഷയങ്ങളും സംഭവങ്ങളും ‘നേരും നുണയും എന്ന പുസ്തകത്തിൽ കാണാം.

കേരളത്തിലെ സാഹിത്യകാരന്മാരും , രാഷ്ട്രീയ നേതാക്കളും , പത്രാധിപരും , പത്രപ്രവർത്തകരും ഇതിലെ വൈവിധ്യമുള്ള ഉള്ളടക്കത്തിൽ അങ്ങിങ്ങായി സ്പർശിക്കപ്പെട്ടിട്ടുണ്ട്. ബഷീറിന്റേതു മാത്രമായ നർമ്മ രസം ചോദ്യങ്ങൾക്കുള്ള മറുപടികളിലും , കത്തുകളിലും , തുളുമ്പുന്നത് കാണാം.നേരും നുണയും വായിച്ച് അവസാനിക്കുമ്പോഴേക്കും ബഷീർ നമ്മളെ വൈകാരിക ബ്രഹ്മാണ്ഡത്തിൽ ഒന്ന് ചുറ്റിച്ചു കൊണ്ടുവന്നു കഴിഞ്ഞിരിക്കും. മലയാള സാഹിത്യത്തിൽ ഈ അത്ഭുതം ഒരാൾക്ക് മാത്രമേ സാധിക്കൂ , ബഷീറിന് മാത്രം.

ബഷീറിന്റെ ഒരു ഭഗവത്ഗീതയും കുറെ മുലകളും

ബഷീറിന്റെ കഥാലോകത്തിൽ നിന്നുള്ള പന്ത്രണ്ട് കഥകളുടെ സമാഹാരമാണ് ഒരു ഭഗവത്ഗീതയും കുറെ മുലകളും. ഒരു ഭഗവത്ഗീതയും കുറെ മുലകളും ,സെൽഫിച്ചികൾ , ഒരു കരിമൂർഖൻ , കമ്മ്യൂണിസ്റ് ഡെൻ , തങ്കമോതിരം , എട്ടുകാലി മമ്മൂഞ്ഞ് , നൂറ്റൊന്ന് നാക്കുകൾ , പാമ്പും കണ്ണാടിയും , മന്നാ ആൻഡ് ശങ്കാ , റേഡിയോഗ്രാം എന്ന തേര് , ഭർർ റ് !!! , പത്ത് നേതാക്കന്മാരെ ആവശ്യമുണ്ട്.എന്നിവയാണ് പുസ്തകത്തിലെ കഥകൾ.

ഓർമ്മയുടെ അറകൾ

”അനുഭവങ്ങള് ഒരു ഭൂഖണ്ഡത്തെത്തന്നെ സാഹിത്യത്തിലേക്ക് കൊണ്ടുവരാന് ബഷീറിനു കഴിഞ്ഞു” എം.എന്.വിജയന് പറഞ്ഞത് പോലെഅനുഭവങ്ങളുടെ വന്കരകള് കടന്നുവന്ന് വൈലാലിലെ വീട്ടില് മാങ്കോസ്റ്റിന് മരച്ചുവട്ടിലിരുന്ന് ലോകത്തെ എഴുതിയ ബഷീര്. വൈക്കം മുഹമ്മദ് ബഷീറിന്റെ ഓർമ്മക്കുറിപ്പുകളുടെ സമാഹാരമാണ് ‘ഓർമ്മയുടെ അറകൾ. ചന്ദ്രിക ആഴ്ചപ്പതിപ്പിൽ പ്രസിദ്ധീകരിച്ചുവന്ന കുറിപ്പുകൾ 1973-ൽ നാഷണൽ ബുക്സ്റ്റാൾ പുസ്തകരൂപത്തിൽ പ്രസിദ്ധീകരിച്ചു. ബി.എം. ഗഫൂർ, പി.കെ. മുഹമ്മദ്, ഐ.വി. ശശി, പുനലൂർ രാജൻ, ശ്രീധരൻ, എം.എ. ഹകീം, കെ.കെ. ആമു തുടങ്ങിയവരുമായുള്ള സംഭാഷണത്തിന്റെ പശ്ചാത്തലത്തിലാണ്, അപൂർണ്ണമായ ഈ ആത്മകഥ നീങ്ങുന്നത്

ബഷീറിന്റെ ബാലസാഹിത്യം സർപ്പയജ്ഞം

ബഷീറിനു ചുറ്റും മനുഷ്യര് വേണം . സ്നേഹം സ്വീകരിക്കുകയും നല്കുകയും ചെയ്യുന്ന മനുഷ്യർ തന്നെ വേണം . കൊച്ചുകുട്ടികളായാലും മതി . സി എന് അഹമ്മദ് മൗലവിയോട് മതതത്വങ്ങള് ചര്ച്ചചെയ്യുന്നത്ര ശ്രദ്ധയിലും ഗൗരവത്തിലുമാണ് അഞ്ചുവയസുകാരന് കുട്ടിയുടെ ആവശ്യങ്ങളും വാശികളും കൈകാര്യം ചെയ്യുന്നത് .
എംടി വാസുദേവൻ നായർ സർപ്പയജ്‌ഞം എന്ന പുസ്തകത്തിൽ എഴുതിയതിങ്ങനെ .

സർപ്പ യജ്‌ഞം , അനിയൻ , നെയ്‌മോഷണം , കിടന്നുമുള്ളി , ആനപ്പൂട , നീർനാഗം , അച്ഛൻ വീഴുമ്പോൾ , ആനയെ വാരി , ആനക്കള്ളൻ , പഴം എന്നീ കഥകളാണ് ഈ പുസ്തകത്തിൽ.

മാതൃഭാഷയില്‍ നിന്നുള്ള കൃതികളുടെ അകല്‍ച്ച നമ്മുടെ ബാലസാഹിത്യവളര്‍ച്ചയെ സാരമായി ബാധിച്ചിട്ടുണ്ടെന്നും, കഥകള്‍ പറഞ്ഞുകൊടുത്തും മുത്തശ്ശിക്കവിതകള്‍ ചൊല്ലിക്കൊടുത്തും നല്ല കവിതാഭാഗങ്ങള്‍ കാണാതെ പഠിപ്പിച്ച് അക്ഷര ശ്ലോകങ്ങള്‍ പരിചയിച്ചും ഭാഷാമാധുര്യം മാമ്പഴച്ചാറുപോലെ ഇളം മനസ്സില്‍ ഇറ്റിച്ചുകൊടുത്തിരുന്ന മാതാപിതാക്കളെയും അധ്യാപകരെയും ഇപ്പോള്‍ നമ്മുടെ കളിയരങ്ങില്‍ കാണാറില്ലെന്നും പ്രശസ്ത ബാലസാഹിത്യകാരന്‍ സിപ്പി പള്ളിപ്പുറം. ഇന്ന് ന്യൂജന്‍ മാതാപിതാക്കള്‍ സോഷ്യല്‍ മീഡിയയുടെ അടിമകളാക്കിയാണ് തങ്ങളുടെ കുട്ടികളെ വര്‍ത്തുന്നതെന്നും അദ്ദഹം ചൂണ്ടിക്കാട്ടി. ഡി സി ബുക്‌സ് എഡിറ്റര്‍ ശ്രീദേവി നടത്തിയ അഭിമുഖത്തിലാണ് അദ്ദേഹം ഇക്കാര്യങ്ങള്‍ വ്യക്തമാക്കിയത്.

പുതിയ തലമുറയിലെ മാതാപിതാക്കളും അധ്യാപകരും മനസ്സുവച്ചാല്‍ ഇനിയും കുഞ്ഞുങ്ങളെ നല്ല സാഹിത്യാസ്വാദകരും സാഹിത്യകാരന്മാരുമായി വളര്‍ത്തിയെടുക്കാന്‍ കഴിയും. അതുകൊണ്ട് രക്ഷകര്‍ത്താക്കളും അധ്യാപകരും ഒരു പുനര്‍ചിന്തനത്തിന് ഒരുങ്ങിയേ തീരൂ. ഇല്ലെങ്കില്‍ സാഹിത്യം മനസ്സിലാക്കാത്ത വെറും യന്ത്രപ്പാവകള്‍ മാത്രമായി നമ്മുടെ കുട്ടികള്‍ മാറാനിടയുണ്ടെന്നും അദ്ദേഹം ഓര്‍മ്മിപ്പിച്ചു.

അഭിമുഖത്തിന്റെ പൂര്‍ണ്ണരൂപം;

?.അറുപത് വര്‍ഷത്തിനിടയില്‍ കുട്ടികളുടെ സാഹിത്യത്തിനുണ്ടായ വളര്‍ച്ചയും തളര്‍ച്ചയും എന്തൊക്കെയാണ്?

കഴിഞ്ഞ അറുപതു വര്‍ഷങ്ങള്‍ക്കിടയില്‍ മലയാള ബാലസാഹിത്യത്തിനുണ്ടായ വളര്‍ച്ച വളരെ അഭിമാനകരവും അത്ഭുതകരവുമാണെന്നു പറയുന്നതില്‍ തെറ്റില്ല. കിളിപ്പാട്ടുകളും പിന്നെ 1960 നു മുമ്പ് ശരിക്കും പറഞ്ഞാല്‍ നമ്മുടെ പരമ്പരാഗത മുത്തശ്ശിക്കഥകളും മറ്റുചില ലൊട്ടുലൊടുക്ക് കൃതികളും മാത്രമേ ബാലസാഹിത്യമെന്ന പേരില്‍ ഇവിടെ ഉണ്ടായിരുന്നുള്ളൂ. എങ്കിലും നമ്മുടെ മുത്തശ്ശിപ്പാട്ടുകളും മുത്തശ്ശിക്കഥകളും പകര്‍ന്നു തരുന്ന അനുഭവം എല്ലായിടത്തും സജീവമായിരുന്നു. 1954-ല്‍ തിരുകൊച്ചി സര്‍ക്കാര്‍ ‘സോപാനം’ എന്ന പേരില്‍ ഒരു ബാലസാഹിത്യപരമ്പര പ്രസിദ്ധീകരിച്ചിട്ടുണ്ട്. നമ്മുടെ ബാലസാഹിത്യ രംഗത്ത് മാറ്റത്തിന്റെ ഒരു കാറ്റുവീശാന്‍ തുടങ്ങിയത് 1961 മുതല്‍ക്കാണ്. കോട്ടയത്തെ സാഹിത്യപ്രവര്‍ത്തക സഹകരണസംഘം 1961 മുതല്‍ പ്രസിദ്ധപ്പെടുത്തി വന്നിരുന്ന സമ്മാനപ്പെട്ടികള്‍ ബാലസാഹിത്യ ചരിത്രത്തിലെ നാഴികക്കല്ലുകള്‍ തന്നെയായിരുന്നു. 1968 വരെ ഇതു തുടര്‍ന്നു.

കാരൂര്‍, പൊന്‍കുന്നം വര്‍ക്കി, ലളിതാംബിക അന്തര്‍ജ്ജനം, മാലി, പി. നരേന്ദ്രനാഥ്, കുഞ്ഞുണ്ണി, കെ.വി.രാമനാഥന്‍. ഗോപാലകൃഷ്ണന്‍ കോലടി, ടി.വി.ജോണ്‍, ഏവൂര്‍ പരമേശ്വരന്‍, പി.ടി.ഭാസ്‌ക്കരപ്പണിക്കര്‍, കെ.ജി.സേതുനാഥ്, അമ്പാടി കാര്‍ത്ത്യായനിയമ്മ, ചെറുകാട്, എ.പി.പി. നമ്പൂതിരി, പാലാ നാരായണന്‍നായര്‍, പന്മന രാമചന്ദ്രന്‍നായര്‍, പി.നാരായണക്കുറുപ്പ് തുടങ്ങിയവരെല്ലാം ബാലസാഹിത്യരംഗത്തേക്ക് കടന്നുവന്നത് ഇക്കാലത്തായിരുന്നു. അതിനുമുമ്പ് ചങ്ങമ്പുഴ ‘ബാലസാഹിതി’ എന്ന പേരില്‍ ഒരു ബാലസാഹിത്യ പരമ്പരയ്ക്ക് രൂപം നല്‍കിയിരുന്നു. എന്നാല്‍ മലയാളത്തില്‍ കുട്ടികള്‍ക്കുവേണ്ടിയുള്ള ആദ്യകവിതാ സമാഹാരം 1922 ല്‍ പ്രസിദ്ധം ചെയ്ത കുമാരനാശാന്റെ ‘പുഷ്പവാടി’യായിരുന്നു. പന്തളം കേരളവര്‍മ്മയും ഉള്ളൂരും ഇക്കാലത്ത് കുട്ടികള്‍ക്കുവേണ്ടി നല്ല ബാലകവിതകള്‍ രചിക്കുന്നുണ്ടായിരുന്നു. ഇവരെ പിന്‍തുടര്‍ന്ന് അക്കിത്തവും വൈലോപ്പിള്ളിയും കുഞ്ഞുണ്ണിയുമൊക്കെ രംഗത്തുവന്നു.

അന്താരാഷ്ട്ര ശിശുവര്‍ഷമായി ആഘോഷിക്കപ്പെട്ട 1979-ല്‍ ഉദ്ദേശിക്കാത്ത ഒരു കുതിച്ചുചാട്ടമാണ് നമ്മുടെ ബാലസാഹിത്യ രംഗത്തുണ്ടായത്. ഈ കാലഘട്ടത്തില്‍ ഡി സി ബുക്‌സ് നൂറോളംകൃതികള്‍ നമ്മുടെ കുട്ടികള്‍ക്ക് സംഭാവന ചെയ്തു. സുമംഗലയുടെ പഞ്ചതന്ത്രവും പി.ഐ.ശങ്കരന്റെ ഈസോപ്പുകഥകളും ജാതക കഥകളും ആന്‍ഡേഴ്‌സണ്‍ കഥകളും ബഹുവര്‍ണ്ണ ചിത്രങ്ങളോടെ പുറത്തിറക്കിയത് അക്കാലത്താണ്. എസ്.പി.സി.എസും, കേരള ശാസ്ത്രസാഹിത്യ പരിഷത്തും, എന്തിനു പറയുന്നു കേരളസാഹിത്യ അക്കാദമി പോലും ഈ അവസരത്തില്‍ ബാലസാഹിത്യ കൃതികള്‍ പ്രസിദ്ധീകരിക്കാന്‍ മുന്നോട്ടിറങ്ങി. 1981-ല്‍ സാഹിത്യ അക്കാദമിയുടെ ബാലസാഹിത്യ കൃതികള്‍ പ്രകാശനം ചെയ്തത് ഭാരതത്തിന്റെ അന്നത്തെ പ്രധാനമന്ത്രി ശ്രീമതി ഇന്ദിരാഗാന്ധിയായിരുന്നു. തുടര്‍ന്ന് ബാലസാഹിത്യത്തിന് നല്ലൊരു കാലമായിരുന്നു. പി. നരേന്ദ്രനാഥിന്റെ കുഞ്ഞിക്കൂനന്‍, വൈലോപ്പിള്ളിയുടെ മിന്നാമിന്നി, കെ വി. രാമനാഥന്റെ അത്ഭുതവാനരന്മാര്‍, മാലിയുടെ സര്‍വ്വജിത്തിന്റെ സമുദ്രസഞ്ചാരം, ഗോപാലകൃഷ്ണന്‍ കോലടിയുടെ ഊഞ്ഞാല്‍, ഉറൂബിന്റെ അങ്കവീരന്‍, നന്തനാരുടെ ഉണ്ണിക്കുട്ടന്റെ ലോകം, അന്തര്‍ജ്ജനത്തിന്റെ ഗോസായി പറഞ്ഞ കഥ, സുമംഗലയുടെ കുറിഞ്ഞിയും കൂട്ടുകാരും, എം.ടി.യുടെ മാണിക്യക്കല്ല്, എസ്.കെ.പൊറ്റെക്കാട്ടിന്റെ കത്രീന, പള്ളിക്കര വി.പി.മുഹമ്മദിന്റെ കുഞ്ഞായന്റെ കുസൃതികള്‍, ചെറുകാടിന്റെ തന്തക്കുറുക്കന്‍, മുട്ടത്തുവര്‍ക്കിയുടെ ഒരുകുടയും കുഞ്ഞുപെങ്ങളും, വി.ബാലകൃഷ്ണന്റെ ഒറ്റയാന്‍, സി.എ.കിട്ടുണ്ണിയുടെ മുടന്തനായ മുയല്‍, കെ. തായാട്ടിന്റൈ നാം ചങ്ങല പൊട്ടിച്ച കഥ, പ്രൊഫ.ശിവദാസിന്റെ കിയോകിയോ, പി വത്സലയുടെ പുലിക്കുട്ടന്‍, ഒ.എന്‍.വി.യുടെ വളപ്പൊട്ടുകള്‍, പെരുമ്പടവത്തിന്റെ നിലാവിന്റെ ഭംഗി, സി. രാധാകൃഷ്ണന്റെ അകലങ്ങളിലെ കുട്ടികള്‍, സുഗതകുമാരിയുടെ വാഴത്തേന്‍, ചെമ്മനം ചാക്കോയുടെ ചക്കരമാമ്പഴം, സക്കറിയായുടെ വായനാമുറി, എന്‍.പി. ഹാഫിസ് മുഹമ്മദിന്റെ പുള്ളിപ്പുലിയും ആമക്കുട്ടനും, ജി.ശങ്കരപ്പിള്ളയുടെ പ്ലാവിലത്തൊപ്പികള്‍ തുടങ്ങിയ പുസ്തകങ്ങളെല്ലാം പില്‍ക്കാലത്ത് നമ്മുടെ ബാലസാഹിത്യത്തിന് ലഭിച്ച മികച്ച സമ്മാനമായി മാറി. ഇപ്പോള്‍ നമ്മുടെ ബാലസാഹിത്യം സജീവമാണെന്നു പറയാം. എങ്കിലും കുട്ടികളുടെ വായനാശീലം തീരെ വറ്റിക്കൊണ്ടിരിക്കുന്നു.

?. നമ്മുടെ ബാലസാഹിത്യം അഭിമുഖീകരിക്കുന്ന വെല്ലുവിളികള്‍ എന്തൊക്കെ?

മാതൃഭാഷയില്‍ നിന്നുള്ള കൃതികളുടെ അകല്‍ച്ച നമ്മുടെ ബാലസാഹിത്യവളര്‍ച്ചയെ സാരമായി ബാധിച്ചിട്ടുണ്ട്. പി.നരേന്ദ്രനാഥിന്റെയും മാലിയുടെയും സുമംഗലയുടേയും കുഞ്ഞുണ്ണിയുടേയും കൃതികള്‍ക്കുണ്ടായിരുന്ന, നല്‍കിക്കൊണ്ടിരുന്ന അനുഭവം, ബാലയുഗവും പൂമ്പാറ്റയും ബാലഭൂമിയും ലാലൂലീലയും തളിരും പൂക്കളും ബാലമംഗളവുമൊക്കെ വായിക്കാന്‍ ആവേശത്തോടെ കാത്തിരുന്ന വായനയുടെ ആ വസന്തകാലം പൂര്‍ണ്ണമായും മറന്നു എന്നാണ് ഇപ്പോഴത്തെ കുട്ടികളുമായി ഇടപെടുമ്പോള്‍ ഞാന്‍ ബലമായി വിശ്വസിക്കുന്നത്.

?. സാമൂഹ്യമാധ്യമങ്ങളും സാങ്കേതിക വിദ്യയും കുട്ടികളുടെ ഭാവനയെ വിശാലവും യുക്തിപൂര്‍ണ്ണവും ആക്കിയിട്ടുണ്ട്. ഈ മാറ്റത്തെ നമ്മുടെ ബാലസാഹിത്യം അഭിമുഖീകരിച്ചിട്ടുണ്ടോ?

നവമാധ്യമങ്ങളുടെ കടന്നുകയറ്റം കുട്ടികളുടെ വായനയെ നന്നായി തളര്‍ത്തിയിരിക്കുന്നു. കുട്ടികളില്‍ കൂടുതല്‍ പേരും വാട്ട്‌സ് ആപ്പിന്റെയും ഫെയ്‌സ് ബുക്കിന്റെയും മൊബൈല്‍ ഗെയിമുകളുടെയും തടവറയിലാണിപ്പോള്‍. അതുകൊണ്ടുതന്നെ ബാലപ്രസിദ്ധീകരണങ്ങളുടെയും ബാലസാഹിത്യ കൃതികളുടെയും വായനയും പ്രചാരവും കുറഞ്ഞുവരുന്നുവെന്നത് നിഷേധിക്കാനാവാത്ത ഒരു സത്യമാണ്. കുട്ടികളെ നവമാധ്യമങ്ങളില്‍ തളച്ചിടാനാണ് ന്യൂജന്‍ രക്ഷാകര്‍ത്താക്കളില്‍ കൂടുതല്‍പേരും ആഗ്രഹിക്കുന്നത്. അതുകൊണ്ടുതന്നെയാണ് കണ്ണടച്ചു തുറക്കുന്നത്ര വേഗതയില്‍ നമ്മുടെ കുട്ടികള്‍ വായനയില്‍ നിന്ന് ഒളിച്ചോടിയത്. ”എന്റെ മക്കളിപ്പോള്‍ വാട്‌സ് ആപ്പില്‍ നിന്നും ഫെയ്‌സ്ബുക്കില്‍ നിന്നുമൊക്കെ വലിയകാര്യങ്ങള്‍ പഠിച്ചുകൊണ്ടിരിക്കുകയാണ്. പുസ്തകം പഠിക്കേണ്ട ആവശ്യമൊന്നുമില്ല. എല്ലാം അതില്‍നിന്നു കിട്ടിക്കോളും.” കുഞ്ഞുണ്ണിമാസ്റ്റര്‍ പറഞ്ഞതുപോലെ ‘വായന വാസനയ്ക്ക് വളം’ എന്നു വിശ്വസിക്കാന്‍ ഇപ്പോഴത്തെ രക്ഷകര്‍ത്താക്കളില്‍ പലരും വിശ്വസിക്കുന്നില്ല.

?.കുട്ടികളില്‍ സാഹിത്യാവബോധം വളര്‍ത്തുന്നതില്‍ നമ്മുടെ കരിക്കുലം എത്രത്തോളം പര്യാപ്തമാണ്?

കുട്ടികളില്‍ സാഹിത്യബോധം വളര്‍ത്തിയെടുക്കുന്നതില്‍ നമ്മുടെ കവികള്‍ നന്നായി ജാഗ്രത പുലര്‍ത്തുന്നുണ്ടെന്നാണ് എന്റെ വിശ്വാസം. എന്നാല്‍ ശാസ്ത്രസാഹിത്യ പരിഷത്തുമായി ബന്ധപ്പെട്ട ചിലരുടെ കടന്നുകയറ്റം നമ്മുടെ മലയാള പാഠാവലികളെ പലപ്പോഴും വികലമാക്കിയിട്ടുണ്ടെന്ന കാഴ്ചപ്പാടാണ് എനിക്കുള്ളത്. ശാസ്ത്രസാങ്കേതിക കാര്യങ്ങള്‍ക്ക് അമിതപ്രാധാന്യം നല്‍കുന്നത് കുട്ടികളുടെ ഭാഷാപരമായ വളര്‍ച്ചയ്ക്കും സര്‍ഗ്ഗാത്മകതയ്ക്കും തടസ്സമുണ്ടാക്കുന്നുണ്ട്. അത്തരം കാര്യങ്ങള്‍ ശാസ്ത്രവിഷയങ്ങളുമായി ബന്ധപ്പെടുത്തി പഠിപ്പിച്ചുകൊള്ളട്ടെ. അതുകൂടുതല്‍ മാതൃഭാഷാപാഠാവലിയില്‍ തന്നെ കുത്തിനിറക്കണമെന്ന കാഴ്ചപ്പാട് നല്ലതല്ല.

?. കുട്ടികളില്‍ ഭാഷാബോധവും സാഹിത്യാവബോധവും സൃഷ്ടിച്ചെടുക്കാന്‍ നമ്മളെന്തൊക്കെയാണ് ചെയ്യേണ്ടത്?

ലോകത്തിലുണ്ടായിട്ടുള്ള പഴയ സാഹിത്യത്തിന്റെ മേന്മയും പുതിയ സാഹിത്യത്തിന്റെ മേന്മയും ഒരുപോലെ പരിചയപ്പെടുത്താന്‍ നാം ശ്രമിക്കണം. പഴയതൊക്കെ മോശമാണ്, പുതിയ സാഹിത്യവും പുതിയ കാഴ്ചപ്പാടുകളും മാത്രമേ കുട്ടിയെ പരിചയപ്പെടുത്താവൂ എന്ന ധാരണ തെറ്റാണ്. നമ്മുടെ സാഹിത്യ പൈതൃകത്തിന്റെ മൂല്യം പുതിയ തലമുറയെ നന്നായി പരിചയപ്പെടുത്തേണ്ടതാണ്. നമ്മുടെ കവിതാപാരമ്പര്യത്തില്‍ നിന്നൊക്കെ കുട്ടികളെ ആട്ടിയോടിക്കുന്നത് നമ്മള്‍ തന്നെയാണ്. താളവും ഈണവുമില്ലാത്തത് വായിച്ചാല്‍ മനസ്സിലാകാത്തതുമായ ന്യൂജന്‍ കവിതകള്‍ ഇളംമനസ്സില്‍ കുത്തിവയ്ക്കാനുള്ള ഒരു ശ്രമം ഇപ്പോള്‍ നടക്കുന്നുണ്ട്. പുതിയ തലമുറ കാവ്യാടിസ്ഥാനത്തില്‍ നിന്ന് അകന്നുമാറാന്‍ ഇതാണ് കാരണം. നമ്മുടെ പാരമ്പര്യകവിതകളും പഴഞ്ചൊല്ലുകളും കടങ്കഥകളും ഒരുപരിധിവരെ ഇളം തലമുറയ്ക്ക് നാം പങ്കുവച്ചു കൊടുക്കേണ്ടതുണ്ട്. എങ്കില്‍ മാത്രമേ നമ്മുടെ ഭാഷാബോധവും സാഹിത്യാവബോധവും കൈവിട്ടുപോകാതെ കാത്തുസൂക്ഷിക്കാന്‍ നമുക്ക് കഴിയുകയുള്ളൂ.

?. കുട്ടികളെ രൂപപ്പെടുത്തുന്നതില്‍ നിര്‍ണ്ണായക പങ്കുവഹിക്കുന്നവരാണ് രക്ഷിതാക്കളും അധ്യാപകരും. കുട്ടികളുമായി ദീര്‍ഘകാലമായി സംവദിക്കുന്ന എഴുത്തുകാരന്‍ എന്ന നിലയില്‍ അവരോട് പറയാനുള്ളത്?

രക്ഷകര്‍ത്താക്കളും അദ്ധ്യാപകരുമാണ് നമ്മുടെ മുന്‍തലമുറയ്ക്ക് സാഹിത്യാവബോധത്തിന്റെയും ഭാഷാധ്യാനത്തിന്റെയും കിളിവാതില്‍ തുറന്നുകൊടുത്തിരുന്നത്. കഥകള്‍ പറഞ്ഞുകൊടുത്തും മുത്തശ്ശിക്കവിതകള്‍ ചൊല്ലിക്കൊടുത്തും നല്ല കവിതാഭാഗങ്ങള്‍ കാണാതെ പഠിപ്പിച്ച് അക്ഷര ശ്ലോകങ്ങള്‍ പരിചയിച്ചും ഭാഷാമാധുര്യം മാമ്പഴച്ചാറുപോലെ ഇളം മനസ്സില്‍ ഇറ്റിച്ചുകൊടുത്തിരുന്ന മാതാപിതാക്കളും അധ്യാപകരും ഇപ്പോള്‍ നമ്മുടെ കളിയരങ്ങില്‍ ഇല്ല. അവരാണ് നമ്മുടെ തലമുറകളെ കഥാമനസ്സും കവിതാ മനസ്സുമുള്ളവരായി വളര്‍ത്തിയത്.
പുതിയ തലമുറയിലെ മാതാപിതാക്കളും അധ്യാപകരും മനസ്സുവച്ചാല്‍ ഇനിയും കുഞ്ഞുങ്ങളെ നല്ല സാഹിത്യാസ്വാദകരും സാഹിത്യകാരന്മാരുമായി വളര്‍ത്തിയെടുക്കാന്‍ കഴിയും. അതുകൊണ്ട് രക്ഷകര്‍ത്താക്കളും അധ്യാപകരും ഒരു പുനര്‍ചിന്തനത്തിന് ഒരുങ്ങിയേ തീരൂ. ഇല്ലെങ്കില്‍ സാഹിത്യം മനസ്സിലാക്കാത്ത വെറും യന്ത്രപ്പാവകള്‍ മാത്രമായി നമ്മുടെ കുട്ടികള്‍ മാറാനിടയുണ്ട്.

മൃഗങ്ങള്‍ക്കെതിരെയുള്ള ക്രൂരത തടയല്‍ നിയമം-2017 എന്ന പേരില്‍ കേന്ദ്ര സര്‍ക്കാര്‍ പുതിയൊരു വിജ്ഞാപനം ഇറക്കിയിരിക്കുന്നതിന്റെ രാഷ്ട്രീയലക്ഷ്യങ്ങളെക്കുറിച്ചുള്ള ചര്‍ച്ചകളാണ് ഇന്ത്യയിലെമ്പാടും ഇപ്പോള്‍ നടക്കുന്നത്. ഈ നിയമമനുസരിച്ച് പശു, കാള, പോത്ത്, ഒട്ടകം, പൈക്കിടാവ് തുടങ്ങിയവയൊന്നും കശാപ്പിനായി വില്‍ക്കാനോ കൈമാറ്റംചെയ്യാനോ സാധ്യമല്ലാതാവുന്നു. ഈ നിയമം ഫലത്തില്‍ സാമൂഹികവും സാമ്പത്തികവുമായ വലിയൊരു പ്രതിസന്ധിയിലേക്കാണ് കൊണ്ടുവന്നെത്തിക്കുകയെന്ന് നിഷ്പക്ഷമായി ചിന്തിക്കുന്ന ആര്‍ക്കും മനസ്സിലാക്കാവുന്ന കാര്യമാണ്. മാംസാഹാരം കഴിക്കുന്നവര്‍ക്കും മാംസസംസ്‌കരണമേഖലയില്‍ പ്രവര്‍ത്തിക്കുന്നവര്‍ക്കും തുകല്‍വ്യവസായ രംഗത്തുള്ളവര്‍ക്കും ഈയൊരു നിയമംമൂലം വന്‍ പ്രതിസന്ധിയാണ് വരുത്തിത്തീര്‍ക്കുകയെന്ന് ഇതിനകം ദേശീയമാധ്യമങ്ങളെല്ലാം തന്നെ വിലയിരുത്തിയിട്ടുണ്ട്.

സംസ്ഥാനങ്ങളുടെ അധികാരപരിധിയില്‍ കൈകടത്തുക മാത്രമല്ല ഇതിനു പിന്നിലുള്ള ഗൂഢലക്ഷ്യം, ഇത് ഇന്ത്യയിലെ ദലിതുകള്‍ക്കും മതന്യൂനപക്ഷങ്ങള്‍ക്കും നേരെ പശുരാഷ്ട്രീയത്തിന്റെ പേരില്‍ സംഘപരിവാര്‍ ഹിന്ദുത്വകാര്‍ഡ് അടിച്ചേല്‍പ്പിക്കുന്നതിന്റെ കൃത്യമായ അജണ്ടതന്നെയാണെന്ന് ഇന്ത്യയിലെ ദലിത് ബുദ്ധിജീവികളും എഴുത്തുകാരും വളരെമുമ്പുതന്നെ എഴുതുകയും പ്രസംഗിക്കുകയും പുസ്തകങ്ങള്‍ പ്രസിദ്ധീകരിക്കുകയുമൊക്കെ ചെയ്തിട്ടുണ്ട്. കാഞ്ച ഐലയ്യയുടെ ‘എരുമദേശീയത’, ‘ഞാനെന്തുകൊണ്ട് ഹിന്ദുവല്ല’, ‘ദൈവമെന്ന രാഷ്ട്രമീമാംസകന്‍’ തുടങ്ങിയവ, ഇന്ത്യയുടെ ഇപ്പോഴത്തെ ഫാസിസ്റ്റ് നടപടികളെക്കുറിച്ച് പ്രവചനാത്മകമായി ഇടപെട്ടുകൊണ്ട് നമ്മുടെ ബൗദ്ധികമണ്ഡലത്തെയും പൊതുസമൂഹത്തിന്റെ മനസ്സാക്ഷിയെയും പിടിച്ചുലച്ച കൃതികളാണ്.

സംഘപരിവാര്‍ വളരെക്കാലമായി മതരാഷ്ട്രീയത്തിന്റെ വിധ്വംസകമായ പ്രവര്‍ത്തികളിലേര്‍പ്പെട്ടുകൊണ്ട് ഉത്തരേന്ത്യന്‍ ഗ്രാമങ്ങളിലും ഹിന്ദു ഭൂരിപക്ഷപ്രദേശങ്ങളിലും നടത്തിവരുന്ന മുസ്ലിം-ദലിത് ആക്രമണങ്ങള്‍ ഇത്തരം കരിനിയമംവഴി കുറച്ചുകൂടി വ്യാപിക്കുകയും അതിന്റെ ഭീകരത വര്‍ദ്ധിപ്പിക്കുകയുംചെയ്യും എന്നല്ലാതെ സാധാരണമനുഷ്യന് എന്തു ഗുണഫലമാണ് ഇതുവഴി നേടാനാവുകയെന്ന ചോദ്യം ‘ബീഫും ബിലീഫും‘ എന്ന പുസ്തകത്തിലൂടെ രവിചന്ദ്രന്‍ സി. മുന്നോട്ടുവെയ്ക്കുന്നുണ്ട്. ജനങ്ങള്‍ എന്തു തിന്നണം, എന്ത് തിന്നരുത് എന്ന് നിര്‍ണ്ണയിക്കുന്നത് ഒരു ഭരണകൂടമോ ഏതെങ്കിലുമൊരു പാര്‍ട്ടിയോ സംഘടനയോ ആകുന്നത് ജനാധിപത്യവിരുദ്ധതയും ഫാസിസവുമാണെന്ന് തീര്‍ച്ചയാണ്.

‘ജീര്‍ണ്ണിച്ച മതധാര്‍മ്മികത ഒരു മതേതരരാജ്യത്തെ പ്രാകൃതമായി വിസ്തരിക്കുകയാണ്. ബംഗ്ലാദേശിന്റെ പാക്കിസ്ഥാന്റെ അഫ്ഗാനിസ്ഥാന്റെ ഒരു വികലാനുകരണമായി, ജനാധിപത്യബോധത്തിനും സഹിഷ്ണുതയ്ക്കും പേരുകേട്ട ഈ രാജ്യം അധഃപതിക്കുമ്പോള്‍ കുറ്റക്കാരായി മുന്നില്‍വരുന്നത് രാജ്യത്തെ ഭൂരിപക്ഷ വര്‍ഗ്ഗീയതയാണ്’ എന്ന് ബീഫും ബിലീഫും എന്ന പുസ്തകത്തിന്റെ ആമുഖത്തില്‍ രവിചന്ദ്രന്‍ എഴുതിയത് ഈയൊരു രാഷ്ട്രീയകാലാവസ്ഥയില്‍ പ്രസക്തമാകുന്നു.

നീണ്ട വേനലവധികഴിഞ്ഞു സ്‌കൂള്‍ തുറക്കുകയല്ലേ..കൊച്ചുകൂട്ടുകാര്‍ പുത്തനുടുപ്പും ബാഗും, കുടയും പുസ്തകങ്ങളുമൊക്കയായി സ്‌കൂളില്‍ പോകാന്‍ തയ്യാറായിക്കഴിഞ്ഞു. ചിലര്‍ ഒരു ക്ലാസില്‍ നിന്ന് ജയിച്ച് വലിയക്ലാസിലേക്ക് കടക്കാനുള്ള സന്തോഷത്തിലാവും. എന്നാല്‍ ചിലര്‍ നേഴ്‌സറി സ്‌കൂളികളില്‍ നിന്ന് ഒന്നാംക്ലാസിലേക്ക് കടക്കാനുള്ള സന്തോഷത്തിലുമാകും. ചേട്ടനും ചേച്ചിയും ഒക്കെ കവിതകള്‍ ചൊല്ലുന്നതും കഥകള്‍ പറയുന്നതുകേട്ടും തനിക്കും പഠിക്കാന്‍ പോകണം എന്ന് വാശിപിടിച്ചിരിക്കുന്ന കുരുന്നുകള്‍ ഇനിമുതല്‍ അറിവിന്റെ ബാലപാഠങ്ങള്‍ പഠിച്ചുതുടങ്ങും. എല്‍കെജി, യുകെജി കുട്ടികള്‍ക്കും ഒന്നാംക്ലസിലെ കുട്ടികള്‍ക്കും, അക്ഷരം കൂട്ടിവായിക്കാന്‍ പഠിച്ച കുട്ടികള്‍ക്കുമൊക്കെ വായിച്ചുരസിക്കാനായി ഡി സി ബുക്‌സ് മാമ്പഴം നിരവധി പുസ്തകങ്ങളാണ് പുറത്തിറക്കിയിരിക്കുന്നത്. മനോഹരമായ ചിത്രങ്ങളും ഉള്‍പ്പെടുത്തി, കാക്കയുടെയും പൂച്ചയുടെയും മുയലിന്റെയും ഒക്കെ നിരവധി കുട്ടിക്കഥകളാണ് സമാഹരിച്ച് പുറത്തിറക്കിയിരിക്കുന്നത്.

കുട്ടൂകാര്‍ക്ക് ഉറക്കെ വായിച്ചുകൊടുക്കാനും തനിയെ വായിക്കാനും പാകത്തില്‍ തയ്യാറക്കിയ പുസ്തകങ്ങളില്‍ നീലക്കുറുക്കന്‍, കുഞ്ഞിപ്പാറു എന്നീ പുസ്തകങ്ങള്‍ ഇപ്പോള്‍ വിപണികളിലെത്തിയിട്ടുണ്ട്. കെ ശ്രീകുമാര്‍, ആബിദാ യൂസഫ്, ആര്‍ രാംദാസ് എന്നിവര്‍ ചേര്‍ന്നാണ് ഈ കഥപുസ്തകങ്ങള്‍ തയ്യാറാക്കിയിരിക്കുന്നത്.

നന്മയുടെയും ശരിയുടെയും നീതിയുടെയും നല്ലപാഠങ്ങള്‍ പറഞ്ഞുതരുന്ന ഏഴുകഥകളാണ് രണ്ടു പുസ്തകത്തിലുമായി നല്‍കിയിരിക്കുന്നത്. കുഞ്ഞിപ്പാറുവും ഏഴാങ്ങളമാരും, കുട്ടിപ്രാവും അനിയത്തിപ്രാവും, പായസം കുടിച്ച കുഞ്ഞുപ്രാവ് എന്നീ രസകരമായ മൂന്നകഥകളാണ് ആബിദാ യൂസഫ്, ആര്‍ രാംദാസ് എന്നിവര്‍ പുരാഖ്യാനം ചെയ്ത കുഞ്ഞിപ്പാറുവുവില്‍ ഉള്ളത്.  “മിടുക്കിക്കാക്കച്ചി, നീലക്കുറുക്കന്‍, ഈച്ചയും പൂച്ചയും, ചന്ദ്രനിലെ മുയല്‍” എന്നീ കുട്ടിക്കഥകളാണ് നീലക്കുറുക്കനില്‍ ഉള്ളടക്കം ചെയ്തിരിക്കുന്നത്.

അഭിലാഷ് എന്‍, സിധീഷ് കോട്ടാമ്പ്രം, അനില്‍ നാരായണന്‍, ജാഫര്‍ എം എസ് എന്നിവരാണ് കുഞ്ഞിപ്പാറുവിന്റെയും കുട്ടിപ്രാവിന്റെയും നീലക്കുറുക്കന്റെയും, മിടുക്കിക്കാക്കച്ചിയുടെയുമക്കെ ചിത്രങ്ങള്‍ വരച്ചിരിക്കുന്നത്.

സ്‌നേഹത്തിന്റെയും സഹനത്തിന്റെയും കാരുണ്യത്തിന്റെയും സന്ദേശവുമായി പുണ്യമാസം വന്നെത്തി. ഹിജ്‌റ വര്‍ഷം ശവ്വാല്‍ മാസത്തിലെ ആദ്യ ദിവസമുള്ള ലോക മുസ്ലീങ്ങളുടെ ആഘോഷമാണ് ഈദുല്‍ ഫിത്ര്‍ അഥവാ ചെറിയ പെരുന്നാള്‍. റമദാന്‍ വ്രതമനുഷ്ഠാനത്തിന്റെ പരിസമാപ്തികുറിച്ചുകൊണ്ടാണ് ഈദുല്‍ ഫിത്ര്‍ ആഘോഷിക്കപ്പെടുന്നത്. ഈദുല്‍ ഫിത്ര്‍ എന്നാല്‍ മലയാളിക്ക് ചെറിയ പെരുന്നാളാണ്. ഈദ് എന്ന അറബിക് പദത്തിന് ആഘോഷം എന്നും ഫിത്ര്‍ എന്ന പദത്തിന് നോമ്പു തുറക്കല്‍ എന്നുമാണ് അര്‍ത്ഥം. അതിനാല്‍ റമദാന്‍ മാസമുടനീളം ആചരിച്ച നോമ്പിന്റെ പൂര്‍ത്തികരണത്തിനൊടുവിലുള്ള നോമ്പുതുറ എന്നതാണ് ഈദുല്‍ ഫിത്ര്‍ എന്നത് പ്രതിനിധാനം ചെയ്യുന്നത്. ഈദിന്റെ (പെരുന്നാളിന്റെ) ആദ്യ ദിനം റമദാന്‍ കഴിഞ്ഞു വരുന്ന മാസമായ ശവ്വാല്‍ ഒന്നിനായിരിക്കും.

ഈദുല്‍ ഫിത്ര്‍ ദിനത്തില്‍ വിശ്വാസികള്‍ വ്രതമനുഷ്ടിക്കുന്നത് മതപരമായി വിലക്കപ്പെട്ടിരിക്കുന്നു. പെരുന്നാള്‍ ദിവസം രാവിലെ നടക്കുന്ന ഈദ് നമസ്‌കാരമാണ് പ്രധാനപ്പെട്ട ഒരു ചടങ്ങ്. ഈദ് നമസ്‌കാരത്തിനു മുമ്പ് അന്നേദിവസം കഴിക്കാനുള്ളതു കഴിച്ച് മിച്ചമുള്ളവര്‍ ഫിത്ര്‍ സക്കാത്ത് എന്ന ദാനം നിര്‍വഹിക്കണം.

ഈദ് നമസ്‌കാരം ഈദ് ഗാഹുകളിലും പള്ളികളിലും നടന്നു വരുന്നു.പെരുന്നാള്‍ ദിനത്തിലെ ഭക്ഷണ രീതികളും മറ്റ് ആഘോഷപരിപാടികളും പല രാജ്യങ്ങളിലും വ്യത്യസ്തമാണ്. ഇന്ത്യയില്‍ സാധാരണയായി തയ്യാറാക്കപ്പെടുന്ന ഭക്ഷണം സുവിദമായ ബിരിയാണിയാണ്. നോമ്പ് നോറ്റും പോലെതന്നെ പ്രധാനമാണ് നോമ്പ് തുറക്കലും. ഇസ്ലാം മതവിശ്വാസികള്‍ക്കിടയില്‍ നോമ്പുതുറ വിഭവങ്ങള്‍ എന്നൊരുകൂട്ടം വിഭവങ്ങള്‍ തന്നെയുണ്ട്. കേരളത്തിലെ പ്രധാന നോമ്പുതുറ വിഭവങ്ങളാണ് ‘125 നോമ്പുതുറ വിഭവങ്ങള്‍‘ എന്ന പാചക പുസ്തകത്തിലൂടെ സുബൈദ ഉബൈദ് പരിചയപ്പെടുത്തുന്നത്.

ഒരു സ്‌പെഷ്യല്‍ വിഭവങ്ങള്‍ പരിചയപ്പെടാം..

തുര്‍ക്കിപ്പത്തിരി

ചേരുവകള്‍
1. മൈദ – 1/2 കിലോ
2. നെയ്യ് – 1 ടീസ്പൂണ്‍
3. ഉപ്പ്, വെള്ളം – ആവശ്യത്തിന്
4. എണ്ണ – വറുക്കാന്‍ ആവശ്യത്തിന്

എരിവുള്ള ഫില്ലിങ്ങിന്
5. ബീഫ്, മട്ടണ്‍ അല്ലെങ്കില്‍
ചിക്കന്‍ – 1/4 കിലോ
6. മുളകുപൊടി – 1 ടീസ്പൂണ്‍
7. മഞ്ഞള്‍പ്പൊടി – 1/4 ടീസ്പൂണ്‍
8. ഉപ്പ് – പാകത്തിന്
9. എണ്ണ – 1 ടേബിള്‍സ്പൂണ്‍
10. സവാള ചെറുതായി
അരിഞ്ഞത് – 1/2 കിലോ
11. പച്ചമുളക്
അരിഞ്ഞത് – 6 എണ്ണം
12. ഇഞ്ചി ചതച്ചത് – 1/2 ടേബിള്‍സ്പൂണ്‍
13. വെളുത്തുള്ളി
ചതച്ചത് – 1/2 ടീസ്പൂണ്‍
14. ഗരംമസാല – 1 ടീസ്പൂണ്‍
15. മല്ലിയില അരിഞ്ഞത് – കുറച്ച്

മധുരമുള്ള ഫില്ലിങ്ങിന്
16. മുട്ട – 5 എണ്ണം
17. പഞ്ചസാര – 3 ടേബിള്‍സ്പൂണ്‍
18. നെയ്യ് – 1 ടേൂിള്‍സ്പൂണ്‍
19. അണ്ടിപ്പരിപ്പ്
നുറുക്കിയത് – 6 എണ്ണം
20. കിസ്മിസ് – 1 ടേബിള്‍സ്പൂണ്‍

തയ്യാറാക്കുന്ന വിധം
മൈദയില്‍ നെയ്യും ആവശ്യത്തിനു വെള്ളവും ഉപ്പും ചേര്‍ത്തു കുഴച്ച് കട്ടിയുള്ള മാവാക്കുക. ഈ മാവില്‍ ഒരു ഭാഗമെടുത്തു വല്യ ഉരുളകളാക്കുക. ഇവ നേര്‍മയായി വലിയ വൃത്താകൃതിയില്‍ പരത്തുക. അച്ചാര്‍കുപ്പിയുടെ മൂടി ഉപയോഗിച്ച് ഇവയില്‍ നിന്നു ചെറിയ വൃത്തങ്ങള്‍ മുറിച്ചെടുക്കുക. 25 എണ്ണം ഉണ്ടായിരിക്കണം. ഒരു പാത്രത്തില്‍ എണ്ണയൊഴിച്ച് ഇവ പൂരിപോലെ വറുത്തുകോരുക. ബാക്കിയുള്ള മൈദാമാവ് ചെറുനാരങ്ങാ വലുപ്പത്തില്‍ ഉരുളകളാക്കി ചപ്പാത്തി വലുപ്പത്തില്‍ പരത്തുക 25 എണ്ണം.

എരിവുള്ള ഫില്ലിങ്ങ് തയ്യാറാക്കല്‍
ഒരു പ്രഷര്‍ കുക്കറില്‍ ഇറച്ചി, മുളകുപൊടി, മഞ്ഞള്‍പ്പൊടി, ഉപ്പ് എന്നിവ ചേര്‍ത്ത് വേവിക്കുക. വെന്ത ഇറച്ചി പിച്ചിയിടുക. ചുവടുകട്ടിയുള്ള ഒരു പാത്രത്തില്‍ ഒരു ടേബിള്‍സ്പൂണ്‍ എണ്ണയൊഴിച്ച് സവാള, പച്ചമുളക്, ഇഞ്ചി, വെളുത്തുള്ളി എന്നിവയിട്ട് ഇളക്കി വഴറ്റുക. അതില്‍ ഇറച്ചിയും ഗരംമസാലയും ഉപ്പും ചേര്‍ക്കുക. വെള്ളമയം ഇല്ലാതാകുന്നതുവരെ എല്ലാംകൂടി ഇളക്കി വേവിക്കുക. മല്ലിയിലയും ചേര്‍ക്കുക.

മധുരമുള്ള ഫില്ലിങ്ങിന്
ഒരു ബൗളില്‍ മുട്ടയും പഞ്ചസാരയും ചേര്‍ത്തു കലക്കുക. ചുവടുകട്ടിയുള്ള മറ്റൊരു പാത്രത്തില്‍ നെയ്യ് ചേര്‍ത്തു ഈ മുട്ടക്കൂട്ട് ഒഴിച്ച് ചിക്കി വറുക്കുക. അതില്‍ അണ്ടിപ്പരിപ്പും കിസ്മിസും ചേര്‍ത്തിളക്കുക.

തുര്‍ക്കിപ്പത്തിരി തയ്യാറാക്കാന്‍
ചപ്പാത്തി വലുപ്പത്തില്‍ പരത്തിവച്ച മാവെടുത്ത് അതിന്റെ മധ്യത്തില്‍ ഒരു ടീസ്പൂണ്‍ എരിവുള്ള ഫില്ലിങ്ങ് നിരത്തുക. വറുത്തുവച്ച ഒരു പൂരി അതിന്റെ മുകളില്‍ വയ്ക്കുക. ഒരു ടീസ്പൂണ്‍ മധുരമുള്ള ഫില്ലിങ്ങ് അതിന്റെ മുകളില്‍ നിരത്തുക. അടിയിലുള്ള ചപ്പാത്തി ചുറ്റുഭാഗത്തു നിന്നും മുകളിലേക്കെടുത്തു മധ്യത്തില്‍ ഞൊറിഞ്ഞുവയ്ക്കുക.. അറ്റത്ത് ബാക്കിയുള്ളമാവ് നുള്ളിക്കളയുക. അവശേഷിക്കുന്ന ചപ്പാത്തിമാവ്, ഫില്ലങ്ങ് എന്നിവകൊണ്ടും ഇങ്ങനെ ചെയ്യുക. ഒരു പാനില്‍ എണ്ണയൊഴിച്ച്, തുര്‍ക്കിപ്പത്തിരികള്‍ അല്പാല്പമായി അതിലിട്ട് ബ്രൗണ്‍ നിറത്തില്‍ വറുത്തു കോരുക. ചൂടോടെ കഴിക്കാം.