ഭാരതീയ ഇതിഹാസ സഞ്ചയത്തിലെ അനശ്വരങ്ങളായ പുരാണകഥാപാത്രങ്ങളെ ലളിതമായും ആസ്വാദ്യകരമായും അവതരിപ്പിക്കുന്ന പരമ്പരയാണ് പുരാണകഥാപാത്രങ്ങള്‍. ഈ പരമ്പരയില്‍ ഉള്‍പ്പെടുത്തി ഡി സി ബുക്‌സ് മാമ്പഴം ഇംപ്രിന്റില്‍ പ്രസിദ്ധീകരിച്ചിരിക്കുന്ന പുസ്തകമാണ് ദ്രോണര്‍. പാണ്ഡവരുടെയും കൗരവരുടെയും ഗുരുനാഥനാണ് ദ്രോണര്‍. ഭരദ്വാജ മഹര്‍ഷിയുടെ പുത്രനായ ഇദ്ദേഹത്തിന്റെ പ്രതികാരവും ജീവിതവുമാണ് ദ്രോണര്‍ എന്ന പുസ്തകത്തില്‍ പറയുന്നത്.
ദ്രുപദരാജപുത്രനും ദ്രോണരും ഭരദ്വാജ മഹര്‍ഷിയുടെ സമീപത്താണ് വിദ്യാഭ്യാസം നടത്തിയിരുന്നത്. അന്ന് ദ്രോണരുടെ ഉറ്റസുഹൃത്തായിരുന്ന ദ്രുപദരാജ കുമാരന്‍ രാജാവാകുമ്പോള്‍ തന്റെ പകുതിരാജ്യം ദ്രോണര്‍ക്കു നല്കുമെന്ന് പറഞ്ഞിരുന്നു. കാലം കടന്നുപോയി. ദാരിദ്ര്യദുഃഖത്തിലായ ദ്രോണാചാര്യര്‍ പഴയ സുഹൃത്തിനെക്കണ്ട് സഹായം അഭ്യര്‍ഥിക്കാമെന്നു കരുതി രാജധാനിയിലെത്തി എന്നാല്‍ ദ്രോണരെ ദ്രുപദരാജാവ് പരിഹസിച്ച് അയയ്ക്കുകയാണുണ്ടായത്.
പിന്നീട് ഹസ്തിനപുരിയിലെത്തിയ ദ്രോണര്‍ പാണ്ഡവകൗരവ കുമാരന്മാരുടെ അസ്ത്രാഭ്യാസ കര്‍മ്മം ഏറ്റെടുക്കുന്നു. തുടര്‍ന്ന് ശിഷ്യനായ അര്‍ജുനനിലൂടെ ദ്രുപദരാജാവിനോടുള്ള തന്റെ പ്രതികാരം ചെയ്യുന്നു. കുരുക്ഷേത്രയുദ്ധത്തില്‍ ഭീഷ്മപിതാമഹന്‍ നിലംപതിച്ചപ്പോള്‍ ദ്രോണര്‍ സൈന്യാധിപസ്ഥാനം ഏറ്റെടുത്തു. അശ്വത്ഥാമാവ് മരിച്ചുവെന്ന ധര്‍മപുത്രരുടെ വാക്കുകള്‍ കേട്ടപാടെ ഇദ്ദേഹം ആയുധം താഴെവച്ച് മരണത്തിനു കീഴടങ്ങി. ഇങ്ങനെ പാണ്ഡവകൗരവരുടെ ഗിരുവായിരുന്ന ദ്രോണാചാര്യരെ കുറിച്ചുള്ള നിങ്ങള്‍കേട്ടതും കേള്‍ക്കാതതുമായ നിരവധികഥകള്‍ നിങ്ങള്‍ക്കായി പുനരാഖ്യാനം ചെയ്തിരിക്കുന്നത് ഡോ പി കെ ചന്ദ്രനാണ്. കഥകള്‍ക്ക് അനുയോജ്യമായ ചിത്രങ്ങള്‍ വരച്ചിരിക്കുന്നത് മിഥുന്‍ സി.എസാണ്. പുസ്തകത്തിന്റെ മൂന്നാമത് പതിപ്പ് ഇപ്പോള്‍ വിപണിയില്‍ ല്ഭ്യമാണ്.