പുസ്തകവിപണിയില്‍ ആഴ്ചകളായി മുന്നേറ്റം തുടരുന്നത് മലയാളത്തിലെ മികച്ച എഴുത്തുകാരുടെ പുസ്തകങ്ങളാണ്. ഓര്‍മ്മ കുറിപ്പ്, കഥാസമാഹാരം, നോവല്‍, ആത്മകഥ എന്നീ മേഖലകളിലെ പുസ്തകങ്ങളാണ് പോയവാരവും മുന്നില്‍ നില്‍ക്കുന്നത്. ദീപാനിശാന്തിന്റെ നനഞ്ഞുതീര്‍ത്ത മഴകള്‍ , സന്തേഷ് ഏച്ചിക്കാനത്തിന്റെ ബിരിയാണി, കെ ആര്‍ മീരയുടെ ആരാച്ചാര്‍ , സുഭാഷ് ചന്ദ്രന്റെ മനുഷ്യന് ഒരു ആമുഖം, മീരയുടെ നോവല്ലകള്‍ എന്നിവയാണ് പോയവാരം ഏറ്റവും കൂടുതല്‍ വിറ്റഴിക്കപ്പെട്ട പുസ്തകങ്ങള്‍.
ബെന്യാമിന്റെ ആടുജീവിതം, ദീപാനിശാന്തിന്റെകുന്നോളമുണ്ടല്ലോ ഭൂതകാലക്കുളിര്‍, എം മുകുന്ദന്റെ കുടനന്നാക്കുന്ന ചോയി, ഭാഗ്യലക്ഷ്മിയുടെസ്വരഭേദങ്ങള്‍, അരിസ്റ്റോ സുരേഷിന്റെ മുത്തേ പൊന്നേ പിണങ്ങല്ലേ എന്നീ പുസ്തകങ്ങള്‍ ബെസ്റ്റ് സെല്ലര്‍ പട്ടികയുടെ ആറുമുതല്‍ പത്ത് വരെയുള്ള സ്ഥാനങ്ങളിലും എത്തി.
ലോകത്തെമാറ്റിമറിച്ച പ്രസംഗങ്ങള്‍, സിസ്റ്റര്‍ ജസ്മിയുടെ ആമേന്‍ ഒരു കന്യാസ്ത്രീയുടെ ആത്മകഥ, ബെന്യാമിന്റെ മഞ്ഞവെയില്‍ മരണങ്ങള്‍, കഥകള്‍ കെ ആര്‍ മീര, ഷെമിയുടെ നടവഴിയിലെ നേരുകള്‍, ടി ഡി രാമകൃഷ്ണന്റെ സുഗന്ധി എന്ന ആണ്ടാള്‍ ദേവനായകി, സാം മാത്യുവിന്റെ സഖാവ്, അരുണ്‍ എഴുത്തച്ഛന്റെ വിശുദ്ധപാപങ്ങളുടെ ഇന്ത്യ എന്നിവയും പോയവാരം ഏറെ ശ്രദ്ധിക്കപ്പെട്ടു.
മലയാളത്തിലെ എക്കാലത്തെയും ക്ലാസിക് കൃതികളില്‍ മുന്നില്‍നില്‍ക്കുന്നത് ഒ.വി.വിജയന്റെഖസാക്കിന്റെ ഇതിഹാസമാണ് പെരുമ്പടവത്തിന്റെ സങ്കീര്‍ത്തനം പോലെ, എം മുകുന്ദന്റെ മയ്യഴിപ്പുഴയുടെ തീരങ്ങളില്‍, ബഷീറിന്റെ ബാല്യകാലസഖി, മാധവിക്കുട്ടിയുടെ നീര്‍മാതളം പൂത്തകാലം, എന്നിവയാണ് തൊട്ടുപിന്നിലുള്ളത്.
വിവര്‍ത്തനകൃതികളെ ആരാധനാപൂര്‍വ്വം കാണുന്ന മലയാള വായനക്കാര്‍ ഏറെ ഇഷ്ടപ്പെടുന്നത് പൗലോ കൊയ്‌ലോയെയും ഏ പി ജെ അബ്ദുള്‍കലാമിനെയുമാണ്. മനസ്സിന്റെ ആലസ്യംമാറ്റി ഊര്‍ജ്ജം പകരുന്ന കൃതികളാണ് ഇരുവരുടെയും. അതുകൊണ്ടുതന്നെ വിവര്‍ത്തനകൃതികളില്‍ മുന്നില്‍ നില്‍ക്കുന്നത് പൗലോ കൊയ്‌ലോയുടെ ആല്‍ക്കെമിസ്റ്റും കലാമിന്റെ അഗ്നിച്ചിറകുകളുമാണ്.
പെരുമാള്‍ മുരുകന്റെ അര്‍ദ്ധനാരീശ്വരന്‍, ബ്രിയാന്‍ വീസ്സിന്റെ ഒരേ ആത്മാവ് അനവധി ശരീരങ്ങള്‍, ഗാന്ധിയുടെ എന്റെ സത്യാന്വേഷണ പരീക്ഷണങ്ങള്‍ എന്നിവയും വായനക്കാര്‍ തേടിയെത്തി.
The post വില്പനയില്‍ മുന്നേറ്റം തുടരുന്ന പുസ്തകങ്ങള്‍ appeared first on DC Books.