നാട്യപ്രധാനമാകും മുമ്പ് നന്മകളാല്‍ സമൃദ്ധവും ജൈവവൈവിധ്യത്താല്‍ സമ്പന്നവും ഹൃദയബന്ധങ്ങളാല്‍ വിശുദ്ധവുമായിരുന്ന മലയാളഗ്രാമങ്ങള്‍ ഇവിടെ ഉണ്ടായിരുന്നു…വിശാലമായ തൊടിയും അതിലെ സമൃദ്ധമായ പ്ലാവും മാവും കശുമാവും ഒക്കെ ആ കാലത്തിന്റെ തനതായ സവിശേഷതകളായിരുന്നു. കുളങ്ങളും പുഴകളും കൈതകളും കൈതോലത്തുമ്പത്തെ പൊന്മാനുകളും അതില്‍ നിറഞ്ഞു നില്‍ക്കുന്നു. ഇത്തരം ഗൃഹാതുരത്വമുണത്തുന്ന ഓര്‍മ്മകള്‍ നമ്മില്‍ നിന്നും മാഞ്ഞുപൊകുന്നു. ഒരു പക്ഷേ പുസ്തകങ്ങളിലോ ഓര്‍മ്മക്കുറിപ്പുകളിലോ കോറിയിട്ട അക്ഷരങ്ങളിലൂടെമാത്രമേ നാം ഇത്തരം നാട്ടുപഴമയുടെ മധുരം നുണയൂ…അത്തരത്തിലൊരു സുവര്‍ണ്ണജീവിതത്തിന്റെ ഓര്‍ത്തെടുക്കലാണ് പി.സുരേന്ദ്രന്റെ ഇലഞ്ഞിപ്പൂമണമുള്ള നാട്ടുവഴികള്‍ എന്ന ഓര്‍മ്മപ്പുസ്തകം. 2011 ല്‍ പ്രസിദ്ധീകരിച്ച പുസ്തകത്തിന്റെ മൂന്നാമത് പതിപ്പ് ഇപ്പോള്‍ പുറത്തിറങ്ങി.
മലയാളത്തിലെ പ്രശസ്ത നോവലിസ്റ്റും ചെറുകഥാകൃത്തുമായ പി. സുരേന്ദ്രന്‍ തന്റെ ജീവിതപന്ഥാവില്‍ പലയിടങ്ങളില്‍നിന്നും ലഭിച്ച വികാരതീവ്രതയാര്‍ന്ന അനുഭവങ്ങളും കണ്ടുമുട്ടിയ സാമൂഹിക, രാഷ്ട്രീയ, സാംസ്‌കാരിക രംഗങ്ങളിലെ ഒറ്റപ്പെട്ട സവിശേഷവ്യക്തിത്വങ്ങളെക്കുറിച്ചുള്ള സ്മരണകളും ഈ പുസ്തകത്തില്‍ ഉള്‍ച്ചേര്‍ത്തിരിക്കുന്നു. ജീവിതത്തെ അതിന്റെ തുടുത്ത സ്പന്ദനങ്ങള്‍ക്കപ്പുറം, സൂക്ഷ്മമായ ഒട്ടേറെ താളങ്ങളെ തിരിച്ചറിഞ്ഞ് ആവിഷ്‌കരിക്കുന്ന ഓര്‍മ്മകളുടെയും അനുഭവങ്ങളുടെയും ഒരു പുസ്തകമാണ് ഇലഞ്ഞിപ്പൂമണമുള്ള നാട്ടുവഴികള്‍.
സജീവമായിരുന്ന ഗ്രാമീണവായനശാലകളും സാഹിത്യചര്‍ച്ചകളും ഇന്നും ഏറെ ഇഷ്ടപ്പെടുന്ന ഒട്ടേറെ ക്ലാസിക് കൃതികളുടെ പ്രസിദ്ധീകരണ കാലവും ഒക്കെച്ചേര്‍ന്ന് തികച്ചും ജീവസ്സുറ്റ ഒരുകാലത്തെ പി.സുരേന്ദ്രന്‍ ഈ പുസ്തകത്തില്‍ രേഖപ്പെടുത്തുന്നുണ്ട്. പത്താംക്ലാസ് പഠനത്തിനുശേഷം മൈസൂരില്‍ ഒരു ജോലിക്കാരനായി ജീവിച്ച ഒരു കാലഘട്ടവും പി.സുരേന്ദ്രന്‍ ഇലഞ്ഞിപ്പൂമണമുള്ള നാട്ടുവഴികളില്‍ അടയാളപ്പെടുത്തുന്നു. വര്‍ക്‌ഷോപ്പിലും മദ്യശാലയിലും പണിയെടുക്കുകയും ഇടക്കാലത്ത് കേരളത്തില്‍ തിരിച്ചുവന്ന് പ്രീ ഡിഗ്രി വജയിച്ചശേഷം മൈസൂരിലേക്കു തിരിച്ചുപോയി ജോലി തുടരുകയും ചെയ്ത, മനുഷ്യജീവിതത്തിന്റെ ഒട്ടേറെ തലങ്ങള്‍ക്ക് അനുഭവസാക്ഷ്യം കുറിയ്ക്കുവാന്‍ സാധിച്ച കാലം അനുവാചകരെ ഒരു പുതിയ ലോകത്തേയ്ക്ക് കൂട്ടിക്കൊണ്ടുപോകുന്നതാണ്.
മുപ്പതിലധികം പുസ്തകങ്ങള്‍ പ്രസിദ്ധീകരിച്ച പി.സുരേന്ദ്രന്‍ ചൈനീസ് മാര്‍ക്കറ്റ് എന്ന കൃതിയിലൂടെ ഓടക്കുഴല്‍ പുരസ്‌കാരവും ജലസന്ധിയിലൂടെ കേരള സാഹിത്യ അക്കാദമി അവാര്‍ഡും തോപ്പില്‍ രവി അവാര്‍ഡും ലഭിച്ചിട്ടുണ്ട്. കേരള ലളിതകലാ അക്കാദമി അവാര്‍ഡ്, അബുദാബി ശക്തി അവാര്‍ഡ്, വി.പി.ശിവകുമാര്‍ സ്മാരക കേളി അവാര്‍ഡ് തുടങ്ങിയവയും ലഭിച്ചിട്ടുണ്ട്. തിരഞ്ഞെടുത്തകഥകള്‍ (1981-2011), ശൂന്യമനുഷ്യര്‍, ദേവദാസികളും ഹിജഡകളും, ഗ്രീഷ്മമാപിനി, ഭൂതനേത്രം, പി സുരേന്ദ്രന്റെ 5 നോവലുകള്‍ തുടങ്ങിയവ ശ്രദ്ധേയ കൃതികളില്‍ ചിലതാണ്.
The post നാട്ടുവഴികളിലെ ഇലഞ്ഞിപ്പൂമണം appeared first on DC Books.