ഹിമാചല്‍ പ്രദേശില്‍ കനത്ത മഴയിലും വെള്ളപ്പൊക്കത്തിലും ഒറ്റപ്പെട്ട ഷൂട്ടിങ് സംഘം സുരക്ഷിതരാണെന്നറിയിച്ച് നടി മഞ്ജു വാര്യര്‍. തന്റെ ഔദ്യോഗിക ഫെയ്‌സ്ബുക്ക് പേജിലൂടെയാണ് നടി ഇക്കാര്യം അറിയിച്ചത്.
“സനല്‍ കുമാര്‍ ശശിധരന്‍ സംവിധാനം ചെയ്യുന്ന കയറ്റം എന്ന ചിത്രത്തിന്റെ മുഴുവന്‍ ടീമും ഞാനും സുരക്ഷിതരായി രാത്രിയോടെ മണാലിയില്‍ തിരിച്ചെത്തിയ വിവരം ഏറെ സന്തോഷത്തോടെ അറിയിക്കുന്നു. മണ്ണിടിച്ചിലും മഞ്ഞും മഴയും മൂലം ആറ് ദിവസത്തോളം ഹിമാചല്‍ പ്രദേശിലെ ഛത്രുവില്‍ കുടുങ്ങിയ ശേഷം ഇപ്പോള്‍ സുരക്ഷിതസ്ഥാനത്ത് എത്തിച്ചേര്‍ന്നിട്ടുണ്ട്. രക്ഷാപ്രവര്‍ത്തനം ഉത്തരവാദിത്തത്തോടെയും വേഗത്തിലും നടപ്പിലാക്കിയ വലിയ മനസ്സുകളോട് നന്ദി പറയുന്നു. നിങ്ങള്‍ നല്‍കിയ സ്‌നേഹത്തിനും കരുതലിനും പ്രാര്‍ത്ഥനകള്‍ക്കും വളരെയധികം നന്ദി.” മഞ്ജു ഫെയ്‌സ്ബുക്കില്‍ കുറിച്ചു.
മഞ്ഞ് വീഴ്ചക്കിടെ സുരക്ഷിതസ്ഥാനത്തേക്ക് സംഘം നടന്നുനീങ്ങുന്നതിന്റെ വീഡിയോയും മഞ്ജു പങ്കുവെച്ചിട്ടുണ്ട്.