ഖത്തറിലെ സാമൂഹിക-സാംസ്‌കാരിക സംഘടനയായ സംസ്‌കൃതിയുടെ ആഭിമുഖ്യത്തില്‍ പ്രവാസി എഴുത്തുകാരി ഷീലാ ടോമിയുടെ വല്ലി എന്ന പുതിയ നോവലിന്റെ പുസ്തകപ്രകാശനവും ചര്‍ച്ചയും സംഘടിപ്പിക്കുന്നു. ഓഗസ്റ്റ് 23-ന് വെള്ളിയാഴ്ച വൈകിട്ട് ആറ് മണിക്ക് ന്യൂ സലാത്തയിലെ സ്‌കില്‍സ് ഡെവലപ്പ്‌മെന്റ് സെന്ററില്‍ വെച്ചാണ് പ്രകാശനം സംഘടിപ്പിച്ചിരിക്കുന്നത്.
കഥ പറച്ചിലിന്റെ വേറിട്ട വഴികള്‍ തേടുന്ന ഷീലാ ടോമിയുടെ വയനാട് പശ്ചാത്തലമാക്കിയുള്ള നോവലാണ് വല്ലി . ഒരു കാലത്ത് കാടും മലയും വെട്ടിപ്പിടിച്ച് ജിവിതം കരുപ്പിടിപ്പിച്ച വയനാട്ടിലെ കുടിയേറ്റ കര്‍ഷകരുടെ ജീവഗാഥയാണിത്. അടുത്തിടെ പുറത്തിറങ്ങിയ നോവലിന് വായനക്കാരില്‍നിന്നും മികച്ച പ്രതികരണമാണ് ലഭിക്കുന്നത്.