തീവ്രവാദികളുടെ തടവിലായ ഭര്‍ത്താവിന്റെ ജീവന്‍ രക്ഷിക്കാന്‍ നവവധു നടത്തുന്ന ശ്രമങ്ങളിലൂടെ വികസിക്കുന്ന ചലച്ചിത്രമാണ് മണിരത്‌നത്തിന്റെ റോജ. ഇരുപത്തിമൂന്ന് വര്‍ഷം മുമ്പ് പുറത്തിറങ്ങിയ ഈ സിനിമ കണ്ടിറങ്ങുമ്പോള്‍ ഒരു സാധാരണക്കാരിയെക്കൊണ്ട് ഇത്രയൊക്കെ സാധിക്കുമോ എന്ന സംശയമായിരുന്നു പ്രേക്ഷക മനസ്സുകളില്‍ ഉണ്ടായിരുന്നത്. പിന്നീട് സമാനമായ പല പ്രമേയങ്ങളും സിനിമയ്ക്കും സാഹിത്യത്തിനും വിഷയമായി… കാലം പുരോഗമിച്ചു.
ഇന്ന് സമൂഹമാധ്യമങ്ങള്‍ അതിശക്തമായിരിക്കുന്നു. അവയുടെ നല്ല രീതിയിലുള്ള ഉപയോഗം പല നിരപരാധികള്‍ക്കും ജീവിതം തിരിച്ചുനല്‍കുന്നു. കണ്ണുതുറക്കാത്ത അധികാരകേന്ദ്രങ്ങളില്‍ സ്വാധീനമുറപ്പാക്കാന്‍ കഴിയും വിധം ജനകീയ കൂട്ടായ്മക്ക് രൂപം നല്‍കാനും അവയിലൂടെ ഒരു നിരപരാധിയുടെ ജീവന്‍ രക്ഷിക്കാനും വലിയ പരിശ്രമം വേണം. സമൂഹമാധ്യമങ്ങളിലൂടെ അത് സാധ്യമാകുന്നു. അത്തരത്തില്‍ ഒരാളാണ് മനുഷ്യനിലെ കരുണ ഇനിയും വറ്റിയിട്ടില്ലാത്തതുകൊണ്ടു മാത്രം ജീവിതം തിരിച്ചുകിട്ടിയ ജയചന്ദ്രന്‍ മൊകേരി. തക്കിജ്ജ എന്റെ ജയില്‍ജീവിതം എന്ന പുസ്തകത്തിലൂടെ അദ്ദേഹത്തെ കൂടുതല്‍ പരിചയപ്പെടാം.
ഒരു അധ്യാപകനായാണ് ജയചന്ദ്രന്‍ മാലിദ്വീപിലെത്തിയത്. പല സ്‌കൂളുകളില്‍ പഠിപ്പിച്ച അദ്ദേഹം എല്ലാവരുടെയും പ്രീതിയും പ്രിയവും പിടിച്ചുപറ്റി. മാലിദ്വീപിനെക്കുറിച്ച് അറിയാത്തവര്‍ക്കായി സമൂഹമാധ്യമങ്ങളിലൂടെ അറിവുകള്‍ പങ്കുവെച്ചു. മാലിദ്വീപിലെ അച്ചടക്കം കുറവായ സ്‌കൂളുകളില്‍ അധ്യാപകരേക്കാള്‍ പ്രാധാന്യം കുട്ടികള്‍ക്കാണ്. ബാലനിയമങ്ങള്‍ കര്‍ക്കശമായതിനാല്‍ കുട്ടികളെ ഉറക്കെ ഒന്ന് ശകാരിക്കാന്‍ പോലും കഴിയാത്ത അവസ്ഥ. ഒരു കുട്ടിയെ ശകാരിച്ചതിന്റെ പേരിലാണ് ജയചന്ദ്രന്റെ ജീവിതം മാറിമറിഞ്ഞത്. ബാലപീഡനക്കുറ്റം ചുമത്തി വിദ്യാര്‍ത്ഥിയും മാതാപിതാക്കളും പരാതി നല്‍കിയതോടെ ജയചന്ദ്രന്‍ തടവിലായി.
അഭിമാനിയായ ഒരു നിരപരാധിക്ക് തടവറ എത്ര മാരകമായ അനുഭവമാണെന്ന് തക്കിജ്ജ എന്റെ ജയില്‍ജീവിതത്തിലൂടെ ജയചന്ദ്രന്‍ വിവരിക്കുന്നു. മയക്കുമരുന്നുകേസിലെയും പീഡനക്കേസിലെയും പ്രതികള്‍ക്കൊപ്പം കഴിച്ചുകൂട്ടിയ മാസങ്ങളുടെ കരളലിയിക്കുന്ന വിവരണം തന്നെയാണ് ഈ പുസ്തകം. എന്നാല്‍ പോകെപ്പോകെ ഒരു ഗൂഡാലോചനയുടെ ഇരയാവുകയായിരുന്നു താനെന്ന് അദ്ദേഹം തിരിച്ചറിഞ്ഞു.
ഇരുട്ടറയില്‍ ഒന്നുമറിയാതെ ജയചന്ദ്രന്‍ കിടക്കുമ്പോള്‍ ആദ്യം സൂചിപ്പിച്ച റോജ സിനിമയുടെ കഥയുമായി സാമ്യമുള്ള ചില സംഭവങ്ങള്‍ കേരളത്തില്‍ നടക്കുകയായിരുന്നു. ജയചന്ദ്രന്റെ ഭാര്യയും സാമൂഹ്യമാധ്യമങ്ങളിലെ സുഹൃത്തുക്കളും മനുഷ്യസ്‌നേഹികളും കക്ഷിരാഷ്ട്രീയത്തിനതീതമായി രാഷ്ട്രീയക്കാരും ഒത്തുപിടിച്ചപ്പോള്‍ ജയചന്ദ്രന്‍ മോചിതനായി. ഈ പോരാട്ടത്തിന്റെ കഥ കൂടിയാണ് തക്കിജ്ജ എന്റെ ജയില്‍ജീവിതം എന്ന പുസ്തകം.
പ്രവാസം, നീതി, നിയമം, സൗഹൃദം, കുടുംബം, മനുഷ്യാവസ്ഥയുടെ ആഗന്തുകസ്വഭാവം ഇവയെക്കുറിച്ചെല്ലാമുള്ള വിചാരങ്ങളിലേക്ക് നമ്മെ നയിക്കാന്‍ ഒരു നിരപരാധിയുടെ സഹനയാത്രയുടെ സത്യകഥയായ തക്കിജ്ജയ്ക്ക് കഴിയും.