കഥകള്‍ കേള്‍ക്കാനും വായിക്കാനും പറയാനും ഇഷ്ടമുള്ള കുട്ടികള്‍ക്കുവേണ്ടി പ്രൊഫ. എസ്. ശിവദാസ് തയ്യാറാക്കിയ പുസ്തകമാണ് അറിവേറും കഥകള്‍. കുട്ടികളെ സ്‌നേഹത്തിലേക്കും നന്മയിലേയ്ക്കും നയിക്കുന്ന കഥകളുടെ സമാഹാരമാണ് ഈ പുസ്തകം. പ്രൊഫ. എസ്. ശിവദാസിന്റെ അറിവൂറും കഥകള്‍, ബുദ്ധിയുണര്‍ത്തും കഥകള്‍,സ്‌നേഹക്കഥകള്‍ സ്വപ്നക്കഥകള്‍, സ്വപ്നക്കുട്ടി എന്നീ പുസ്തകങ്ങള്‍ ഒന്നിച്ചു ചേര്‍ത്താണ് അറിവേറും കഥകള്‍ എന്ന പുസ്തകം തയ്യാറാക്കിയിരിക്കുന്നത്.
അറിവേറും കഥകളിലൂടെ കുഞ്ഞുങ്ങള്‍ക്ക് അറിവിന്റെ നവലോകം തുറന്നു കൊടുക്കുകയാണ് അദ്ദേഹം. കുട്ടികളെ രസിപ്പിക്കുക മാത്രമല്ല അറിവിന്റെ വിശാലമായ ചക്രവാളത്തിലേയ്ക്ക് അവരെ നയിക്കുകയും ബുദ്ധിയും യുക്തിയും മൂല്യബോധവുമുണര്‍ത്തുകയും ചെയ്യുന്നുണ്ട് ഇതിലെ കഥകള്‍. കൂടുതല്‍ ചിന്തിക്കാനും പ്രചോദിപ്പിക്കാനും അറിവേറും കഥകള്‍ കുട്ടികളെ സഹായിക്കുമെന്നതില്‍ തര്‍ക്കമില്ല.
കഥകളോടൊപ്പം കുട്ടികളെ പഠിപ്പിക്കാന്‍ അധ്യാപകരെയും രക്ഷിതാക്കളെയും സഹായിക്കുന്ന വിശദമായ ആക്ടിവിറ്റി കോര്‍ണറും ഈ കഥാസമാഹാരത്തില്‍ ചേര്‍ത്തിട്ടുണ്ട്. കൂടുതല്‍ മനോഹരമായ സ്വപ്‌നങ്ങള്‍ നെയ്യാനും അവ നടപ്പിലാക്കാനും കുഞ്ഞുങ്ങള്‍ക്ക് ഒരു വഴികാട്ടി കൂടിയാണ് ഈ പുസ്തകം. 2015 ല്‍ വെങ്കി വരച്ച മനോഹര ചിത്രങ്ങള്‍ സഹിതം മാമ്പഴം ഇംപ്രിന്റില്‍ പ്രസിദ്ധീകരിച്ച അറിവേറും കഥകളുടെ മൂന്നാമത് പതിപ്പ് ഇപ്പോള്‍ പുറത്തിറങ്ങി.
1940 ഫെബ്രുവരി 19ന് കോട്ടയം ജില്ലയിലെ ഉല്ലല ഗ്രാമത്തിലാണ് പ്രൊഫ. എസ്. ശിവദാസ് ജനിച്ചത്. കോട്ടയം സി.എം.എസ്. കോളേജില്‍ അദ്ധ്യപകനായിരുന്ന പ്രൊഫ. എസ്. ശിവദാസ് യുറീക്ക, ശാസ്ത്രകേരളം, ബാലശാസ്ത്രം, എങ്ങനെ? എങ്ങനെ? എന്നിവയുടെ എഡിറ്റര്‍, കേരള ശാസ്ത്രസാഹിത്യ പരിഷത്തിന്റെ കോട്ടയം ജില്ലാ സ്ഥാപക സെക്രട്ടറി, പരിഷത് പ്രസിദ്ധീകരണ സമിതി ചെയര്‍മാന്‍, വിശ്വവിജ്ഞാനകോശം കണ്‍സള്‍ട്ടിങ് എഡിറ്റര്‍ എന്നീ നിലകളിലും സേവനം അനുഷ്ഠിച്ചിട്ടുണ്ട്.
കഥകള്‍, നാടകങ്ങള്‍, നോവലുകള്‍, ശാസ്ത്രലേഖനങ്ങള്‍, പഠനപ്രവര്‍ത്തനങ്ങള്‍ തുടങ്ങി വിവിധ ശാഖകളിലുള്ളവയാണ് ശിവദാസിന്റെ രചനകള്‍. നിരവധി പുരസ്‌കാരങ്ങള്‍ ലഭിച്ചിട്ടുള്ള പ്രൊഫ. എസ്. ശിവദാസിന് 2015ലെ കേന്ദ്ര സാഹിത്യ അക്കാദമിയുടെ സമഗ്ര സംഭാവനയ്ക്കുള്ള പുരസ്‌കാരവും ലഭിക്കുകയുണ്ടായി.
The post കുട്ടികള്‍ക്ക് വഴികാട്ടിയായ ഒരു കഥപുസ്തകം appeared first on DC Books.