ഇന്ന് ചിങ്ങം ഒന്ന്…മലയാളത്തിന്റെ പുതുവര്‍ഷപ്പിറവി ദിനം. കഴിഞ്ഞ നാളുകളുടെ ദുരിതം മറന്ന് പുതിയൊരു വര്‍ഷത്തിലേക്കുള്ള കാല്‍വെയ്പ്പ്. പ്രളയദുരിതം ബാക്കി വെച്ച നോവുകളിലേക്കാണ് ഇത്തവണ ചിങ്ങം പിറക്കുന്നത്. ആശങ്കകള്‍ ഏറെയുണ്ടെങ്കിലും പ്രതീക്ഷയോടെ പൊന്നിന്‍ ചിങ്ങത്തെ വരവേല്‍ക്കാനൊരുങ്ങുകയാണ് മലയാളികള്‍.
കൊല്ലവര്‍ഷത്തിലെ പ്രഥമ മാസമാണ് ചിങ്ങം. സൂര്യന്‍ ചിങ്ങം രാശിയിലൂടെ സഞ്ചരിക്കുന്ന സമയമാണ് ചിങ്ങമാസം. ചിങ്ങമാസം ഒന്നാം തീയതി കര്‍ഷകദിനം കൂടിയാണ്. കൊയ്‌തെടുത്ത നെല്ലുകൊണ്ട് പത്തായം നിറച്ചിരുന്ന പഴയ കാലത്തിന്റെ ഗൃഹാതുരതയാണ് മലയാളിക്ക് ചിങ്ങമാസം. ഒപ്പം കാണം വിറ്റിട്ടാണെങ്കിലും ഓണമുണ്ണാന്‍ തയ്യാറെടുപ്പുകള്‍ നടത്തേണ്ട സമയമായി എന്ന ഓര്‍മ്മപ്പെടുത്തലിന്റേതും. മലയാളിയുടെ സങ്കല്പത്തിലെ ചിങ്ങമാസം വര്‍ണങ്ങളുടേതാണ്. തുമ്പയും മുക്കുറ്റിയും തുടങ്ങി പുഷ്പിക്കുന്ന ചെടികളെല്ലാം മാവേലി തമ്പുരാനെ വരവേല്‍ക്കാന്‍ അണിഞ്ഞൊരുങ്ങുന്ന മാസം. സ്വര്‍ണവര്‍ണമുള്ള നെല്‍ക്കതരുകള്‍ പാടങ്ങള്‍ക്ക് ശോഭ പകരുന്ന കാലം. മഴക്കോളു മാറി മാനം തെളിയുന്നതിന്റെ തുടക്കം..പക്ഷേ.., ഇന്ന് നിറം വറ്റിയ ഓര്‍മ്മകള്‍ മാത്രമാണ് ആഘോഷം..!
ദുരിതപ്പെയ്ത്തില്‍ തകര്‍ന്നടിഞ്ഞ മണ്ണും മനുഷ്യരും പൂര്‍വ്വാവസ്ഥയിലേക്ക് ഇനിയും എത്തിയിട്ടില്ല. അവരെ നമുക്ക് ജീവിതത്തിലേക്ക് കൈപിടിച്ചുയര്‍ത്തണം. സഹജീവിസ്‌നേഹവും സഹവര്‍ത്തിത്വവും നമുക്ക് കൈമുതലാക്കാം. പ്രകൃതിസംരക്ഷണത്തിന്റെയും ജൈവവൈവിധ്യത്തിന്റെയും പ്രാധാന്യം വരുംതലമുറയെ കൂടി ബോധ്യപ്പെടുത്തി നമുക്ക് ഈ ഭൂമിയുടെ കാവലാകാം.
മഴമാറിയ തെളിമയാര്‍ന്ന ആകാശത്തിന്റെ നിറവിന്റെ പ്രതീക്ഷയിലാണ് ഏവരും. പ്രളയത്തെ ഒന്നായി നേരിട്ട ആ മനസ്സുമായി നമുക്ക് പൊന്നിന്‍ ചിങ്ങത്തെ വരവേല്‍ക്കാം.