ജീവിതത്തില്‍ ഉന്നതവിജയം നേടാന്‍ ആഗ്രഹിക്കുന്നവര്‍ക്ക് മാര്‍ഗ്ഗദര്‍ശിയായ കൈപ്പുസ്തകമാണ് ഉന്നതവിജയത്തിന് 7 വഴികള്. സ്വന്തം ജീവിതാനുഭവങ്ങളുടെ വെളിച്ചത്തില്‍ വിജയത്തിലേക്കുള്ള പ്രായോഗികമായ വഴികളെക്കുറിച്ച് ഈ പുസ്തകത്തിലൂടെ പരിചയപ്പെടുത്തുന്നത് ഇപ്പോള്‍ പത്തനംതിട്ട ജില്ലാകളക്ടറായ ഹരികിഷോര്‍ ഐ.എ.എസ് ആണ്. നിങ്ങള്‍ക്കും ഐ.എ.എസ് നേടാം എന്ന പുസ്തകത്തിനുശേഷം അദ്ദേഹം രചിച്ച ഉന്നതവിജയത്തിന് 7 വഴികള് പ്രസിദ്ധീകൃതമായി ചുരുങ്ങിയ കാലത്തിനുള്ളില്‍ തന്നെ ബെസ്റ്റ്‌സെല്ലര്‍ പട്ടികയില്‍ ഇടം പിടിച്ചുകഴിഞ്ഞു.
വിജയം നേടാനായി ആവശ്യമുള്ള ഏഴ് സ്വഭാവഗുണങ്ങളെ മുന്‍നിര്‍ത്തി അവയെ വികസിപ്പിച്ച് വിശദീകരിക്കുന്ന രീതിയിലാണ് ഉന്നതവിജയത്തിന് 7 വഴികള് എന്ന പുസ്തകത്തിന്റെ ഘടന. ഈ ആശയങ്ങള്‍ പ്രാവര്‍ത്തികമാക്കാന്‍ ശീലിക്കേണ്ട കാര്യങ്ങളും ഉള്‍പ്പെടുത്തിയിട്ടുണ്ട്. ജീവിതത്തില്‍ പുതിയൊരു തുടക്കം കുറിക്കാനും വിജയപഥത്തിലൂടെ മുന്നേറാനും വായനക്കാര്‍ക്ക് കൈത്താങ്ങുന്ന പുസ്തകമാണിതെന്ന കാര്യത്തില്‍ സംശയമില്ല.
വ്യക്തികളാണ് സമൂഹത്തില്‍ മാറ്റമുണ്ടാക്കുന്നത്. അതുകൊണ്ടുതന്നെ വിദ്യാര്‍ദ്ധികള്‍ ഉള്‍പ്പടെ സമൂഹത്തിലെ ഓരോ വ്യക്തിയുടെയും വളര്‍ച്ചയ്ക്ക് വെളിച്ചമേകും വിധത്തില്‍ ലളിതമായാണ് ഹരികിഷോര്‍ പുസ്തകം തയ്യാറാക്കിയിരിക്കുന്നത്. സ്വയം ഉയരാനും തുടര്‍ന്ന് സമൂഹത്തെ നയിക്കാനും സാമൂഹിക പുരോഗതിക്ക് നേതൃത്വം നല്‍കാനും തന്റെ വാക്കുകള്‍ക്ക് സാധിച്ചാല്‍ ഉദ്യമം ധന്യമായെന്ന് ഹരികിഷോര്‍ പറയുന്നു.
2007ലെ സിവില്‍ സര്‍വീസ് പരീക്ഷയില്‍ 14ാം റാങ്കോടെ ഐ.എ.എസ് നേടിയ എസ് ഹരികിഷോര്‍ വിവിധ ജില്ലകളില്‍ സേവനം നടത്തിയിട്ടുണ്ട്. ടൂറിസം, പട്ടികജാതി പട്ടികവര്‍ഗ്ഗ വകുപ്പ് ഡയറക്ടറായും പ്രവര്‍ത്തിച്ചിട്ടുള്ള അദ്ദേഹത്തിന്റെ ഔദ്യോഗിക ജീവിതം ഇത്തരമൊരു പുസ്തകരചനയെ ഏറെ സഹായിച്ചിട്ടുണ്ട്.
The post ഉന്നതവിജയത്തിന് 7 വഴികള് appeared first on DC Books.