കഥാകൃത്ത്, നോവലിസ്റ്റ്, സാമൂഹ്യശാസ്ത്രജ്ഞ, ഫെമിനിസ്റ്റ്, ഗവേഷക എന്നീ നിലകളില്‍ ശ്രദ്ധേയയായ സി.എസ്.ചന്ദ്രികയുടെ ഏറ്റവും പുതിയ കഥാസമാഹാരമായ എന്റെ പച്ചക്കരിമ്പേ പ്രകാശനം ചെയ്തു. തൃശ്ശൂര്‍ സാഹിത്യ അക്കാദമിയിലെ വൈലോപ്പള്ളി ഹാളില്‍ നടന്ന ചടങ്ങില്‍ മലയാളത്തിലെ പ്രശസ്ത എഴുത്തുകാരിയും സാമൂഹി സാറാജോസഫ് കവിതാ ബാലകൃഷ്ണന്‍ എന്നിവര്‍ പുസ്തക പ്രകാശനം നിര്‍വ്വഹിച്ചു. വി കെ ശ്രീരാമന്‍ അദ്ധ്യക്ഷനായിരുന്നു. അന്‍വര്‍ അലി പി പി രാമചന്ദ്രന്‍, റഫീക് അഹമ്മദ്, പി എന്‍ ഗോപീകൃഷ്ണന്‍, എ വി ശ്രീകുമാര്‍ തുടങ്ങിയവര്‍ പങ്കെടുത്തു. സി എസ് ചന്ദ്രിക മറുപടി പ്രസംഗവും നടത്തി.
സാധാരണ ജീവിതസന്ദര്‍ഭങ്ങളെ ഭാവഗീതാത്മകമായ ഉപരിതലവും രാഷ്ട്രീയബോധത്തിന്റെ ഉള്‍ത്തലവും കൊണ്ട് ജീവസ്സുറ്റതാക്കുന്ന കഥകളാണ് സി.എസ്. ചന്ദ്രികയുടേത്. അതിന് ഉത്തരമോദാഹരണമാണ് എന്റെ പച്ചക്കരിമ്പേ എന്ന കഥാസമാഹാരത്തിലെ കഥകള്‍. എന്റെ പച്ചക്കരിമ്പേ എന്ന സമാഹാരത്തിലെ എല്ലാ കഥകളിലും പെണ്ണനുഭവങ്ങളും പെണ്‍കാഴ്ചകളുമുണ്ടെന്ന് എം.മുകുന്ദന്‍ അവതാരികയില്‍ പറയുന്നു. എങ്കിലും സമാഹാരത്തിലെ കഥകളെ പെണ്‍കഥകള്‍ എന്ന് വിളിക്കാന്‍ അദ്ദേഹം താല്‍പര്യപ്പെടുന്നില്ല. പകരം, പെണ്‍സന്ത്രാസത്തിന്റെ രചനകള്‍ എന്ന് വിളിക്കുന്നതാണ് കൂടുതല്‍ ഉചിതമെന്ന് അദ്ദേഹം പറയുന്നു.