പത്തനംതിട്ട ജില്ലാ കളക്ടര്‍ എസ് ഹരികിഷോറിന്റെ ഉന്നതവിജയത്തിന് 7 വഴികള്‍ എന്ന പുസ്തകത്തെക്കുറിച്ച് ജീവിതത്തിന്റെ നാനാതുറകളില്‍ നിന്നും മികച്ച അഭിപ്രായം എത്തുന്നുണ്ട്. അവയില്‍ ഒരു വായനക്കാരന്റെ പ്രതികരണം അല്‍പം വേറിട്ടതായി. എസ് ഹരികിഷോറിനയച്ച കത്തിലൂടെയാണ് അദ്ദേഹം തന്റെ വായനാനുഭവം വെളിപ്പെടുത്തിയത്.
തൊടുപുഴയിലെ കറന്റ് ബുക്‌സ് ശാഖയില്‍ നിന്ന് ഉന്നതവിജയത്തിന് 7 വഴികള്‍ വാങ്ങിയ വായനക്കാരന്‍ ഭാര്യയും രണ്ട് പെണ്മക്കളുമൊത്ത് ഷോപ്പിങിനിറങ്ങിയതായിരുന്നു. പുസ്തകത്തിന്റെ ഉള്ളടക്കത്തില്‍ മുഴുകിയ അദ്ദേഹം ഷോപ്പിങ് ഉപേക്ഷിച്ച് ഹൈവേ സൈഡില്‍ പാര്‍ക്ക് ചെയ്ത തന്റെ കാറിലെത്തി വായന തുടര്‍ന്നു. തുടര്‍ന്ന് വീട്ടിലെത്തി വായന പൂര്‍ത്തിയാക്കി. അഞ്ച് മണിക്ക് പുസ്തകം വാങ്ങിയ താന്‍ രാത്രി പത്തരയോടെ മുഴുവന്‍ വായിച്ചതായി അദ്ദേഹം പറയുന്നു.
പുസ്തകം ഏറെ ഇഷ്ടമായെന്നും ഇത് വിലമതിക്കാനാവാത്തതാണെന്ന് താന്‍ കരുതുന്നുവെന്നും വായനക്കാരന്‍ കത്തില്‍ പറഞ്ഞു. ഓരോരുത്തരുടെയും ആത്മവിശ്വാസത്തെയും ലക്ഷ്യബോധത്തെയും വിജയങ്ങളെയും തീര്‍ച്ചയായും ഉയര്‍ത്താന്‍ പര്യാപ്തമായ ഈ പുസ്തകം എല്ലാവരും വായിക്കേണ്ടതാണെന്നും പറഞ്ഞിട്ടാണ് വായനക്കാരന്‍ കത്ത് അവസാനിപ്പിക്കുന്നത്.
വിജയം നേടാനായി ആവശ്യമുള്ള ഏഴ് സ്വഭാവഗുണങ്ങളെ മുന്‍നിര്‍ത്തി അവയെ വികസിപ്പിച്ച് വിശദീകരിക്കുന്ന രീതിയിലാണ് ഉന്നതവിജയത്തിന് 7 വഴികള്‍ എന്ന പുസ്തകത്തിന്റെ ഘടന. ഈ ആശയങ്ങള്‍ പ്രാവര്‍ത്തികമാക്കാന്‍ ശീലിക്കേണ്ട കാര്യങ്ങളും ഉള്‍പ്പെടുത്തിയിട്ടുണ്ട്. ജീവിതത്തില്‍ പുതിയൊരു തുടക്കം കുറിക്കാനും വിജയപഥത്തിലൂടെ മുന്നേറാനും വായനക്കാര്‍ക്ക് കൈത്താങ്ങുന്ന പുസ്തകമാണിതെന്ന കാര്യത്തില്‍ സംശയമില്ല.
2007ലെ സിവില്‍ സര്‍വീസ് പരീക്ഷയില്‍ 14ാം റാങ്കോടെ ഐ.എ.എസ് നേടിയ എസ് ഹരികിഷോര്‍ വിവിധ ജില്ലകളില്‍ സേവനം നടത്തിയിട്ടുണ്ട്. ടൂറിസം, പട്ടികജാതി പട്ടികവര്‍ഗ്ഗ വകുപ്പ് ഡയറക്ടറായും പ്രവര്‍ത്തിച്ചിട്ടുള്ള അദ്ദേഹത്തിന്റെ ഔദ്യോഗിക ജീവിതം ഇത്തരമൊരു പുസ്തകരചനയെ ഏറെ സഹായിച്ചിട്ടുണ്ട്.
The post ഒറ്റയിരുപ്പില്‍ വായിച്ചുതീര്‍ത്ത പുസ്തകത്തെപ്പറ്റി വായനക്കാരന്‍ appeared first on DC Books.